Gav 100.000 til TV-aksjonen

Pengane frå årets TV-aksjon går til Redd Barna og deira innsats for å hjelpa barn som er råka av krig og konflikt.

«Kvart sjette barn i verda veks opp i krig og konflikt, og det har aldri vore så mange barn på flukt som no. TV-aksjonen i år har difor temaet «La barna leve i fred». Innsamla midlar frå aksjonen går til å gje over 100.000 barn moglegheit til å leika, læra og leva i fred», står det i ei pressemelding.

– Barn blir hardt råka av krig og konflikt rundt om i verda. Krig skapar frykt og tap av menneskeliv, og tek også frå mange barn høve til utdanning og håp om framtida. Vi er glade for å kunna støtta årets TV-aksjon og det viktige arbeidet til Redd Barna, og bidra til å gje ei tryggare og betre framtid for barn som er råka av krig, seier konsernsjef Hilde Merete Aasheim i meldinga.

Fantastisk bidrag

Hydro sine aluminiumsfabrikkar og kraftverk i Norge gjev ein sum kvar til TV-aksjonen, totalt utgjer summen 1.150.000 kroner til Redd Barna sitt arbeid. Produksjonsanlegga til Hydro finst i dag på Karmøy, Sunndal, Årdal, Høyanger, Husnes, Vennesla, Magnor, Stavanger, Sogn, Røldal-Suldal og Rjukan. I tillegg kjem hovudkontoret i Oslo.

– Kvar einaste dag blir barn utsett for brutaliteten til krigen. Dei får ikkje gå på skulen, og dei blir fråtekne håpet for framtida. Barn har rett til å veksa opp i trygge omgjevnader og bli høyrt. Det er dette TV-aksjonen i år handlar om. Over éin million kroner frå Hydro er eit fantastisk bidrag til aksjonen og som verkeleg monnar, seier Birgitte Lange, generalsekretær i Redd Barna.

Pengane frå TV-aksjonen skal fordelast mellom prosjekt i Ukraina, Syria, Bangladesh, Sør-Sudan, Den demokratiske republikken Kongo og Norge. Her i landet skal Redd Barna hjelpa barn som har flykta frå krig og konflikt.