Gaute opna lampeutstilling i Bergen

I invitasjonen inviterte galleriet til den fyrste utstillinga av Norges einaste lampekunstnar. Grenda stakk innom på opningsdagen, og fekk ein liten prat med kunstnaren.

Han fortel at sjølve utstillinga kom til ved litt ulike tilfeldigheiter, og han fekk litt knapt med tid inn mot opninga.

– Eg fekk brått litt dårleg tid, og rakk ikkje å få alle lampane ferdig, men tok likevel med meg to som berre manglar skjerm, seier han, og forklarar at han har brukt vel eitt år på produksjonen.

Lampane er laga i ulike treslag. Nokre har koparrøyr, og dei fleste av kuplane er i 3D-printa plast, designa i ulike mønster. I tillegg har alle trekte leidningar, noko som gjev dei eit eksklusivt preg, ja, til og med støpselet er gjennomtenkt.

Ved inngangen står den mest spesielle lampen. Den har eit organisk uttrykk der ein får ein følelse av noko utanomjordisk.

– Eg begynte i ein ende, så balla det på seg, og det er definitivt den eg har brukt mest tid på. Eg måtte mellom anna berekna korleis eg skulle få til den runde kuppelen av flatt tre, forklarer han.

Utstillinga stod til sundag.

– Eg håpar sjølvsagt noko vert igjen her, resten tek eg med meg heim, så får me sjå om det blir utstilling i heimekommunen.

Gaute fortset inn i kvelden, travel opptatt med å svara på spørsmål frå dei som kom innom for ein kikk. Kanskje tok dei med seg heim ein lampe frå Norges einaste lampekunstnar?