Gaute har kjøpt Mykle mikrobryggeri

Etter fleire år med ølbrygging i liten skala, gjer Gaute Vaage no hobbyen om til binæring og startar bryggeri heime på familiegarden i Våge.

Den 43 år gamle økonomen til Hydro Husnes har lenge hatt ein fasinasjon for ølbrygging, og har gjennom åra produsert stout, ipa, pils, pale ale, bitter og alt du kan tenka deg av forskjellege øltypar i mindre skala nede i kjellaren sin i Våge. Parallelt med at kunnskapen stadig vart større, vaks det også fram ein draum om å gjera hobbyen til ei binæring på garden.

Men med talknusing som yrke, har det ikkje vore vanskeleg å finna unnskyldningar til kvifor han skulle la vera å følgja draumen. Likevel kasta han fornufta ut av vindauga då han fekk nyss i at Reinhard og Margit Lund-Mikkelson vurderte å selja Mykle mikrobryggeri.

– Dette er ein hobby eg har hatt lenge. Eg synest det er veldig kjekt å bryggja og har blitt veldig glad i denne typen øl. Så sjølv om konkurransen er stor og at det er vanskeleg å tena pengar på dette her, så bestemte eg meg for å prøva. Det ville jo vore synd om Kvinnherad ikkje skulle ha eit eige mikrobryggeri, seier 43-åringen.

 

Stor skala

I kjøpet overtek Gaute alt av bryggjeutstyr frå Mykle og oppskrifter, og vil med det få eit komplett bryggjeri som kan produsera 500 liter øl om gangen. Utstyret skal han ta i bruk for fyrste gong i helga som kjem, då med rettleiing frå Mykle-bryggar Reinhard Lund-Mikkelson. Men på sikt så skal utstyret flyttast heim i ein låve på garden.

– Det er tungvint å reisa inn til Omvikdalen å bryggja etter jobb, så eg ynskjer å få utstyret på plass her i Våge så raskt som mogleg, eigentleg. Så får vi sjå kor lang tid det tek, håpet er i alle fall å ha det klart ein gong i løpet av det fyrste kvartalet, seier han og viser fram ein teikning av låven kor han har byrja å teikna inn utstyret.

Etter at alt er kome på plass, vil han også gje bryggeriet eit eige namn. Kva det blir, veit han ikkje enno. Men han har fleire idear som ligg til godgjering i bakhovudet.

– I tillegg til det så skal vi få på plass eit gardsutsal og få produktet ut i butikkar, restaurantar og barar. Så vert neste steg etter det å sjå om vi kan få det ut av kommunen også, seier han.

 

Bryggjer til helga

Det fyrste ølet som blir produsert under ny eigar er Mykle sitt allereie etablerte «Putlo». Det vil vera klart til sal tidleg i februar. Men vidare ynskjer han å produsera eit øl som folk flest likar, samstundes som at han sper på med litt forskjellege variant.

– Så har eg ein tanke om at eg vil selja litt bryggjeutstyr og litt sånn her frå garden. Målet er jo at det skal bli ei binæring her på garden som vi kan tena pengar på. Då vert det juletre og øl, smiler den komande ølbryggjaren.

Han trur at interessa for andre typar øl enn grøn Hansa er på stigande kurs, og samanliknar den typen øl med vin, kor det finst ulik øl som passar bra til ulike typar mat. Men sjølv om han i dag er ein stor ølelskar, var det slett ikkje slik fyrste gong han prøvde sin heimelaga ipa.

– Då likte eg det rett og slett ikkje. Det er kanskje noko med det at du har tanken om vanleg industripils i hovudet, og så smaker det noko heilt anna. Men eg hadde jo brygga 25 liter av det, så eg vart raskt glad i det, smiler han og legg til:

– I dag er eg ikkje så glad i industripils. Etter at eg fekk smaken av den nye typen øl, så har eg heldt meg til det. Så håper eg at kvinnheringane er interessert i å kjøpa kortreist øl i frå Våge, sluttar han.