Går vidare med klimamål for Kvinnherad

Haustens første formannskapssak handla om fastsetjing av klimamål og om Kvinnherad skal delta i Race to Zero-kampanjen, med mål om at Kvinnherad skal vera ein nullutsleppskommune innan 2040. Trass i at politikarane stilte seg samrøystes bak innstillinga, var dei rivande usamde om både notilstand og framtida for klimaet.

Hege Lægreid Røssland (AF) vil ha opp ambisjonsnivået for Kvinnherad sin del, medan Leif Sverre Enes (H) ville ha vekk ordet «klimakrise», heller ha inn «utfordring».

– Alle er einige om at me må gjera noko, vedgjekk likevel Enes.

Synnøve Solbakken (Ap) ville ta seg betre tid, medan Marit Aarthun (KrF) tala for innstillinga.

– Me må ta klimakrisa på alvor. Sentrale politikarar kjem til å melda seg på, forsikra ho.

Kurs

– Eg trur denne saka handlar om å setja ein kurs, og delta i eit race to zero. Det er stortingsval no, og denne perioden me går inn i, vil leggja mykje til rette for å omstilla oss lokalt. Eg ynskjer at me er tydelege på våre ambisjonar lokalt ved å gå for innstillinga. Dette er startskotet for Kvinnherad. Kjem til å få mange saker om miljø på bordet framover. Me kan melda oss av, viss kommunestyret vil det, men vurderer fleirtalet til å villa vera med på dette. Praktisk politikk i saka kjem det til å bli rikelege høve til å gjera seinare, sa ordføraren då han tok ordet.

Enes konkluderte med at han gjekk inn for innstillinga, for han rekna med lang debatt i kommunestyret om temaet.

– Men sidan det er valkamp, skulle eg kanskje gått for 0-utslepp allereie i 2025, gliste han, og fekk siste ordet i debatten.