Går vidare med hamneselskap – ser også på farvassavgift

Etter oppmoding frå politisk hald, har administrasjonen greidd ut mogleg etablering av eit hamnevesen for Kvinnherad. I juni i år vart ei skisse presentert for kommunestyret. Den handla om eit interkommunalt hamneselskap saman med Stord kommune. Politikarane likte det dei fekk høyra, og invitasjon om eit utgreiingssamarbeid vart sendt til Stord. I slutten av oktober takka dei ja til førespurnaden.

Måndag kom saka opp i formannskapet. Kommunedirektøren innstilte på at «Formannskapet sluttar seg til at det vert gjennomført eit utgreiingssamarbeid med Stord kommune for mogleg etablering av interkommunalt hamneselskap. Kostnadsramme for utgreiingsarbeidet vert inntil 400.000 kroner. Formannskapet ber kommunedirektøren utarbeida ein gjennomgang av eksisterande kaiar og hamneanlegg i Kvinnherad kommune, samt ein hamnestrategi for framtidig utvikling innan hamneområdet».

Betalingsautomaten

– Dette er ei sak som har noko for seg, innleia Per Harald Havnen Löfgren Johansen (Ap).

Han kom også med eit tilleggsforslag om å utgreia utviding til andre kommunar.

– Ein ting eg gjerne skulle sett, er at slike interkommunale selskap omfattar fleire kommunar enn oss og Stord. Då tenkjer eg både i Sunnhordland og Hardanger, argumenterte han.

Knut Johannes Helvik (H) ser for seg at eit slikt hamnevesen har stort potensiale for nye inntekter. Han trekte fram eit paradoks med dagens situasjon:

– På ferja mellom Ranavik og Skjersholmane betalar dei farvassavgift til Stord, men ikkje til Kvinnherad.

Ordførar Vegard Bjørnevik (H) kommenterte den siste setninga til Helvik.

– Eg såg det låg eit cruiseskip på fjorden i dag, og lurte på kvar betalingsautomaten er, men den er ikkje der. Så her er det potensiale, smilte han.

Bjørnevik var elles ikkje samd med forslaget til Johansen.

– Stord har eit hamnevesen i dag, så det er naturleg å starta der, meinte han. Bjørnevik la elles til at administrasjonen faktisk skal i møte med Ullensvang kommune. Sistnemnde vedtok ei farvassforskrift seinast i sommar.

Fordi det er gratis

Jostein Rødland (INP) undra kor stor kostnaden vil bli for store skip, til dømes cruiseskip.

– Kan det vera at skip kjem oftare hit fordi det er gratis? Kan vi risikera at dei vil sigla forbi for å spara hamneutgifter? funderte han.

Vegard Bjørnevik forklarte at hamneavgift berre vil gjelda på kommunale kaiar. Ei farvassavgift estimerte han til 10.000 kroner i døgnet for store cruiseskip.

Innstillinga vart samrøystes vedteke. Tilleggsforslaget til Havnen vart vedteke med seks mot to (Bjørnevik og Tofte, begge Høgre) røyster.