Går saman om kunstutstillingar i Ølve

Marta Nerhus bur til vanleg i Bergen, men kjem opphaveleg frå Ølve. Ho har hatt mange utstillingar på både store og små stader, rundt omkring i heile landet. No er ho altså tilbake i heimbygda, saman med Airin, for å laga til kunstutstilling her.

– Dette vert i hovudsak ei utstillingsrekkje med ulike biletkunstnarar. Biletkunst er ikkje berre bilete og måleri, men ei fellesnemning for ulike kunstartar som utrykkjer seg visuelt, forklarer Marta.

Noko fint å sjå på

– Det kan vere alt i frå måleri og teikning, til skulptur og grafikk, fortel ho vidare.

Ein av dei som skal stilla ut, Erling Valtyrson, jobbar med grafikk og mezzotint. Marta fortel at Erling, som tidlegare har stilt ut i både Paris og New York, er ein av få i Noreg som meistrar nettopp denne kunstarten.

Ein annan som skal stilla ut saman med Erling, er lokalmannen og uskedelingen Øyvind Sture. Sture jobbar hovudsakleg med skulptur og måleri, får Grenda forklart.

Marta kan også fortelja at ho har eit stort kunstnarnettverk i Bergen og omland, så det var ingen problem å få med seg kunstnarar til prosjektet.

– Eg synest at det er viktig å visa verk av profesjonelle kunstnarar på mindre stader og spreia interesse og kunnskap om samtidskunst. Livet kan bli rikare i møte med god kunst, fortel ho engasjert.

På spørsmål om kvifor dei tok initiativ til desse utstillingane svarer Airin at ho gjerne ynskjer å gje både lokalsamfunnet og sambygdingane sine ei fin oppleving.

– Eg ynskjer gjerne å gleda folk, og gje dei noko fint å sjå på. Samstundes føler eg vel kanskje at me manglar eit naturleg samlingspunkt her i bygda, seier Airin.

Støtte og dugnadsånd

Airin kjøpte bygget, som ligg i sentrum av Ølve, tilbake i 2018. Ho kallar det for Galleri Banken, då lokalet tidlegare har vore brukt som bank.

– Det er eit veldig fint lokale, men det manglar litt godt lys. Nokre av lysa her inne har pærer som ikkje lenger vert produserte, så me ynskjer veldig gjerne å oppgradera. Problemet er berre at det kostar meir enn Airin har råd til, fortel Marta.

– Me har søkt om litt økonomisk støtte, men håpar gjerne på litt dugnadsånd også. Det viktigaste er sjølvsagt at folk kjem, legg Marta til.

Den fyrste utstillinga har opningsdag laurdag 1. april, og skal stå til 21. mai. Utstillarar då er Kamilla Sajetz Mathisen (skulptur), Anne-Britt Lerøy (grafikk og koldnålsteknikk) og Synneva Heradstveit (akvarell).

Neste utstilling har opningsdag laurdag 27. mai. Utstillarar her vert Erling Valtyrson (grafikk og mezzotint) og Øyvind Sture (måleri og skulptur).

Tredje og siste utstilling har opningsdag laurdag 15. juli. Då er det Marta Nerhus sjølv som skal stilla ut sine eigne verk, bilete og skulpturar laga av metalltråd.

Marta og Airin ynskjer alle velkomne, og håpar på stort engasjement frå både unge og gamle.