Går så det susar
Den nye Bunnpris-butikken på Seimsfoss nærmar seg no eit halvt år med drift, så Grenda tok ein prat med den flunkande nye butikksjefen Raymond Johansen om korleis desse fyrste månadane eigentleg har vore.
– Veit du, det har vore veldig kjekt. Butikken er større, parkeringa er betre og det er lettare tilkomst frå vegen, det er moro å kunne tilby kundane ein moderne butikk. Mange av kundane er positivt overraska og tykkjer at butikken er blitt veldig flott, fortel den svært nøgde butikksjefen.
Johansen innrømmer gladeleg at han ikkje har mykje å klaga på, men om han må setja fingeren på noko så må det vera for stort sal og litt liten butikk.
Annonse
– Salet vårt har faktisk auka meir enn me hadde turt å håpa på. Me har automatisk vareflyt, noko som betyr at butikken bestiller varene automatisk, og salet auka så fort på enkelte produkt at det tok litt tid for systemet å justera seg. Så det einaste problemet har faktisk vore å ha nok varer i butikken, småler butikksjefen.
– I tillegg så skulle eg gjerne sett at butikken var endå litt større. Eg har teke inn litt ekstra varer slik at me kan ha eit godt vareutval på alle område, då hadde det vore fint om butikken var endå litt større, fortset han.
Løyndomsfull
Sjølv om Johansen har vore ein del av Bunnpris-laget lenge, så er han rykande fersk i jobben som butikksjef for den nye butikken. Noko han også verkar svært nøgd med.
Annonse
– Den opphaveleg var planen at eg skulle jobba i regionen og reisa litt mellom butikken på Voss og her på Seimsfoss. Men då Carl Bruno Bodin, som fyrst skulle driva som butikksjef, ynskte litt andre utfordringar og sa opp tidlegare i vår, bestemte me oss for at eg skulle overta her, forklarer Johansen.
– Så då selde eg og kona leilegheita i Bergen og flytta til Uskedalen. Eg overtok offisielt 1. juni, og har i fyrste omgang takka ja til ein kontrakt på fem år. Etter fleire år vekke så er det godt å vera tilbake, og eg trivs veldig godt ute på golvet. Det er også veldig ålreit å få bli kjend med kundane og ha ein meir stabil kvardag, fortset han.
Når det kjem til planar for framtida for butikken er han derimot litt løyndomsfull.
– Det har vore veldig mykje styr no for min del med flytting, kjøpt meg inn som franchisetakar her og tidspress på meg og kona. Men eg har noko i tankane som heiter Seimsdagane. Eg ynskjer å gje noko tilbake til kundane og bygda, byggja ein tradisjon som folk set pris på. Dess mindre ein stad er, dess viktigare er det at me tek vare på naboane våre og kundane våre. Men akkurat kva som kjem er ikkje heilt klart endå, avsluttar han.
