Går kreative vegar for å skapa vekst i bygda

Vil du bidra til vekst i Åkra, samstundes som du får leva ut småbruksdraumen? Då har ekteparet Marit Årthun og Bjørn Rune Bergane løysinga til deg.

Ho er frå Stavanger og han er frå ei lita bygd utanfor Drangedal, men ingen av dei kunne tenkt seg å bu ein annan stad enn i Åkra. No har ekteparet Bergane og Årthun lyst på fleire naboar i bygda, slik at ein kan halda liv i både skule og butikk.

 

Forgubbing

For sjølv om Åkra kan by på biletvenleg utsikt, naturskjønne omgjevnadar og mektige fjell, er det liten tvil om at bygda slit med det same som mange andre små bygder rundt om i landet slit med, nemleg forgubbing. Talet på elevar i skulen er nede i skarve tre, noko som også har ført til at skulen er føreslege nedlagt i kommunedirektør Ragnhild Bjerkvik sitt alternativ to i skissene for ny skulestruktur.

– Tre elevar er ikkje nok. Då vi hadde barn i skulen var talet oppe i 50, det var på mange måtar ein topp og då gjekk også ungdomsskuleelevane her i bygda. Så å koma opp på det talet igjen er urealistisk. Men vi må nok opp på eit tosifra tal om det skal vera liv laga, noko eg også har stor tru på at vil skje, seier Bjørn Rune.

 

Småbruksdraum

Prognosane for elevtalet i Kvinnherad i 2024/25 er negativt over heile linja, bortsett frå på Øyatun og i Åkra. Her viser prognosane vekst, høvesvis ein oppgang på åtte og seks elevar. For Åkra sin del betyr det ei tredobling. Men framleis er ikkje det nok for å koma opp i det grunnlaget ein bør ha. Difor ynskjer Bergane og Årthun no å gjera sitt for å skapa vekst i bygda dei er blitt så glade i.

– Vi ynskjer å få folk til å flytta til Åkra. Då helst eit ungt par med éin unge eller tre som kan byrja i barnehagen eller på skulen, seier Bjørn Rune.

For å få det til stiller dei gardshuset frå 1893 til disposisjon for ein rimeleg penge.

– Her kan dei som ynskjer få levd ut småbruksdraumen sin. Håpet vårt er at det skal lokka til seg nokon som ynskjer å bu i flotte, fredelege omgjevnadar, og som samstundes er interessert i å bidra til å skapa aktivitet i bygda vår, seier Bjørn Rune før Marit legg til:

– Her kan ein dyrka grønsaker, hesja, låna seg eit lam, jakta, fiska og gå flotte turar i fjellet. Har ein lyst til det så er det berre å ta sjansen og prøvebu Åkra, seier ho.

 

Lys i lyspæra heile året

Dei er ikkje ute etter å tena pengar og er heller ikkje interessert i å selja huset. Det aller største håpet er nemleg å få ein av sine fire eigenproduserte heim eingong.

– Vi håpar jo at det vil skje ein eller anna gong, smiler Marit.

– Ja, vi har ikkje sagt til dei at vi har planar om å leiga ut, så du skal sjå det at dei vaknar no, tullar Bjørn Rune.

Dei vart sjølv forelska i Åkra som tilflyttarar gjennom prøve-metoden. Marit hadde familie som dreiv gard i bygda, og hadde besøkt Åkra fleire somrar i barndomen. Og etter å ha leigd ei stund saman med Bjørn Rune, var dei aldri i tvil. Her skulle dei slå seg til ro. Difor håpar dei at dette er ein modell som også passar for andre.

– Det er ei fantastisk bygd. Og det er ingen problem å pendla til jobb verken til Rosendal eller til Husnes. Det tek fort 50 minutt, men vi kan garantera at du slepp å sitta i kø, seier Marit.

Om det skulle koma nokon interessentar, er håpet at det kan gi smitteeffektar. Dei er begge optimistar på bygda sine vegne. Bevis på det har dei fått den siste tida, då har det nemleg dukka opp nye naboar i nabohuset deira, samt at eit ungt par byggjer nytt på nabogarden til gardshuset dei ynskjer å leiga ut.

Det gir håp for framtida, for det verst tenkelege for både Marit og Bjørn Rune er at Åkra skal bli ein rein feriestad.

– Det skal ikkje skje. Men det er tungt å unngå utan skule og butikk. Menneske er nøkkelen til både vekst og aktivitet, og for å få folk til å flytta hit treng ein både skule og butikk. Vi treng rett og slett lys i lyspærene på vinteren også, seier ho.