– Går ikkje an å ha ei kraftlinje hengande over området

Eigil Knutsen (Ap) er leiar i Finanskomiteen på Stortinget. Måndag var han på besøk i Kvinnherad. Programmet inkluderte møte med bedrifta ECG på Årsnes, møte og synfaring på Hydro Husnes, og deltaking på årsmøtet til Kvinnherad Arbeidarparti. Trass eit stramt tidskjema, vart det òg ein rask tur opp til Avlsgarden i Rosendal for å sjå nærare på kraftlinja som går gjennom området.

Linja skal som kjent oppgraderast, og Statnett ynskjer å følgja dagens trasé. Det har vekt sterk lokal motstand, mellom anna frå Synnøve Solbakken (Ap). Ho var med under heile besøket til Eigil Knutsen.

– Han har vore i Kvinnherad fleire gonger før, men hadde ikkje biletet heilt for seg om korleis det ser ut kring Baroniet og Avlsgarden. Eg tenkte difor at han hadde godt av ein tur opp og sjå, sjølv om vi ikkje hadde mykje tid, fortel ho til Grenda.

Sjøkabel

Solbakken tykkjer at naturkvalitetane og kulturlandskapet i og kring Rosendal må ha noko å bety når ny kraftlinje skal etablerast.

– Det er så mykje som ligg i bygda som må takast vare på, mellom anna Baroniet, Avlsgarden, Steinparken og kyrkja. Det går ikkje an å ha ei kraftlinje hengande over området. Er det éin stad i landet vårt ein må sjå ekstra på dette, så må det vera her. At Baroniet hadde 66.000 besøkande i 2023, betyr sjølvsagt mykje for Baroniet, men også for Rosendal og Kvinnherad. Det genererer mange aktivitetar utanom når desse turistane kjem, analyserer Solbakken, som er Kvinnherad kommune sin representant i styret til Baroniet Rosendal.

Ho er veldig glad for at kommunestyret samrøystes har bede om utgreiing av alternativ til luftspenn. Denne haldninga formidla ho vidare til Eigil Knutsen.

– Det var viktig å seia til han at det kun er sjøkabel som gjeld forbi Rosendal og vidare til Seim og Omvikdalen. Som leiar i Finanskomiteen på Stortinget er dette noko han må få vita om, seier Synnøve Solbakken.

– Fekk de noko signal om kva han tenkjer?

– Han sa det var nyttig å sjå området, og han merka seg at dette er ei sak vi jobbar mykje med. Men han sa ikkje noko om kor vidt han støttar oss, sjølvsagt gjorde han ikkje det.

Regjeringa

Til Grenda seier Eigil Knutsen at saka om kraftlinjene neppe kjem til Stortinget, men derimot vil ho fort hamna på bordet til regjeringa. Difor vil han sjølv truleg ikkje bli involvert i prosessen direkte.

– Men det var interessant å sjå området og høyra korleis dei jobbar lokalt for å fremja synspunkta sine. Baroniet er jo ikkje berre viktig for Kvinnherad, men for heile Norge, seier han.