Galleri Guddal klar for sesongopning

I hovudrommet syner kunstnarduoen Guttesterker fram sine bilete, som er ei blanding mellom teikning og grafikk. Duoen oppstod ein sein haustkvekd i 2015 og består av Christoffer Kroge Christensen og Petter Malterud Grøndahl. Dei blir ofte samanlikna med Tidemand og Gude grunna at deira arbeidsfordeling på verka er nokolunde den same, kjem det fram i ei pressemelding.

For og av folket

«Petter er engasjert i naturvern og det var difor naturleg for han å teikna fjell, hav og skyer, mens Christoffer brenn for menneskerettar og teiknar difor menneske og bygningar. Saman skapar dei intrikate verk som utforskar store spørsmål rundt mennesket sin plass på jorda og i universet. Kvart verk framstiller ein bodskap og så godt som kvar einaste detalj i bildet symboliserer eit argument som underbyggjer bodskapen».

– Til verka kjem det også ei historie som blir framført av kunstnarane som ein «performance». Dei nyttar seg av den eldgamle forteljarteknikken for å gjera bodskapen tilgjengeleg for alle og ein kvar. Dette er kunst for folket, av folket, seier Gøril Guddal i pressemeldinga.

– Dei har nemleg ingen kunstfagleg bakgrunn, men er sjølvlærde. Både i kunstfaget, men også i historie, politikk og naturvitskapane. Dei blandar kunnskap frå alle desse fagfelta saman for å prøva å forstå mennesket sin natur, for så å konstruera detalj- og fargerike bilete, som forhåpentlegvis vil skapa ei varig endring i betraktaren sitt sinn, fortset ho.

Møtet mellom

I underetasjen og i stallen kjem Kari Aasen til å syna sin skulpturelle keramikk. Aasen har sin bakgrunn frå Bergen Kunsthåndverksskole og hovudfag i spesialisert kunst frå Kunsthøgskulen i Bergen. Ho har bak seg ei rekkje utstillingar i inn- og utland, samt er kjøpt inn til fleire store museum og samlingar. Ho har også motteke ei rekkje stipend og NK sin ærespris i 2021.

«Aasen arbeider med skulpturelle objekt, installasjonar og ulike prosjekt som uteromma i Bergen sentrum. Hovudsakleg i steingodsleire og porselen. Ho vektlegg møtet mellom materialet og handa i sine keramiske objekt».

– Alle kunstnarane vil vera til stades ved utstillingsopninga og Christoffer frå Guttestreker vil ta dykk med inn i dei finurlege bileta fulle av historier, seier Guddal.

Utstillinga står til 28. april.