Gabler overtek kraftfondet
Etter ein anbodskonkurranse har selskapet Gabler danka ut Storebrand, og overtek som hovudforvaltar av Kvinnherad kommune sitt kraftfond.
Publisert
Heilt sidan kraftfondet vart etablert i 1998, har Storebrand hatt oppdraget med å vera hovudforvaltar på vegner av Kvinnherad kommune. Men i vår vart jobben lyst ut på anbod, og då var det selskapet Gabler som stakk av med sigeren. Dei overtok forvaltninga den 1. juli.
– Dei erstatta Storebrand som kommunen har hatt eit godt samarbeid med heilt sidan kraftfondet vart etablert. Jobben går ut på ordreformidling, likviditetsstyring og rådgjeving til økonomisjef og investeringsutvalet, informerte kommunedirektør Leif Ove Mikkelsen i kommunestyret.
Annonse
Leiar i investeringsutvalet, Knut Johannes Helvik (H), takkar Storebrand for 26 gode år.
– Eg synest det har vore eit veldig godt og fruktbart samarbeid mellom Kvinnherad kommune og Storebrand i alle desse åra, seier han til Grenda.
Uavhengigheit
Men Helvik understrekar at hovudforvaltaren berre utfører det som investeringsutvalet bestemmer. Kommunestyret har på si side ansvaret for å vedta rammene og strategien.
Annonse
– Det har vore veldig mange positive effektar av Storebrand sine plasseringar, til dømes har private equity vore svært lønsamt for Kvinnherad kommune. Storebrand har òg fått gleda av å vera leverandør for mange fond som har vore lønsame, seier han.
Avtalen med Gabler gjeld for fire år. I anbodskonkurransen scora dei på si uavhengigheit, medan Storebrand er eit konglomerat av bank, forsikring og investeringar. Denne uavhengigheita vart vekta som ganske viktig. Pris var ein annan faktor.
– Gabler har dessutan utvikla veldig flotte dataprogram og rapporteringssystem, seier Knut Johannes Helvik.
