Fyrste kvinnelege biskop i Bjørgvin
Kyrkjerådet har tilsett Ragnhild Jepsen som ny biskop i Bjørgvin bispedøme. Ho tek over etter Halvor Nordhaug.
– Eg er glad og takknemleg for utnemninga til biskop i Bjørgvin. Det er ei stor oppgåve som eg går til med glede og audmjukheit, seier ho i ei pressemelding.
Kyrkjerådsleiar Kristin Gunnleiksrud Raaum fortel i pressemeldinga at ho er nøgd med tilsetjinga.
Annonse
– Det er historisk at Bjørgvin har fått si fyrste kvinne som biskop. Jepsen er ein framifrå liturg og ein erfaren leiar, som vil vera med på å utvikla Bjørgvin bispedøme, fortel ho vidare.
Den nye biskopen vart presentert i domkyrkja i Bergen på fredag, 10. februar. Litt seinare i vår, søndag 16. april, kjem ho til å bli vigsla til biskop i Bjørgvin, då kjem også Hans Majestet Kongen til å vera der.
