Fyrste gong det er gjort eit slikt beslag i Norge

Pressekonferansen vart gjennomført på Politihuset i Bergen tysdag føremiddag, med dei største norske mediehusa til stades og direktesending mellom anna på NRK. Etter avtale med politiet fekk Grenda følgja pressekonferansen via Teams.

Til stades var politiadvokat Jørgen Henriksen og områdeleiar Bård Ynnesdal frå Tolletaten i Bergen. Dei hadde lite nytt å seia utover det som kom fram i pressemeldinga tidlegare tysdag og det Bergens Tidende har avdekka dei siste dagane. Men dei stadfesta at seks utanlandske statsborgarar er pågripne, og at beslaget er på godt over 100 kilo kokain. Henriksen fortalde elles at narkotikaen kom til Husnes på eit skip, og at stoffet var festa på skutesida under vasslinja.

– Stoffet vart fjerna i løpet av natta medan båten låg til kai, sa han.

Han slo fast at politiet etterforskar saka vidare med full styrke.

– Samtlege pågripne kjem frå same opprinnelsesland, og kjenner truleg kvarandre frå før. Vi etterforskar breitt og utifrå fleire hypotesar, til dømes kvifor dei reiste til Norge og kva planar dei hadde vidare. Eg vil ikkje gå detaljert inn på komande etterforskingssteg. Per no har vi ikkje konkrete mistenkte, men vi utelukkar ikkje fleire pågripingar, sa Jørgen Henriksen.

Betydeleg innsats

Bård Ynnesdal frå Tolletaten fortalde korleis saka starta.

– Under ein kontroll vart det gjort funn som indikerte at det kunne bli brukt i samband med smugling andre stader i landet. Dei som gjennomførde kontrollen brukte sitt vidsyn og varsla vidare, og det vart sett i verk ulike tiltak som førde til at fartøyet vart identifisert. Det vart lagt ned ein betydeleg innsats, sa han.

Ynnesdal sa at ein over lang tid har følgd med på denne typen skipstrafikk frå Sør-Amerika.

– Vi har rekna med at det er brukt fartøy derifrå til å smugla narkotika til Norge. Dette er eit modus vi har gjennomført kontrollar på gjennom mange år, men dette er fyrste gong vi har treff på denne typen modus. Men det viser at det har vore rett å bruka tid på å etterforska smugling under vasslinja på båtar frå Sør-Amerika, informerte Bård Ynnesdal. Han la til at liknande smuglingsmetodar er blitt avdekka andre stader i Europa.

Tolletaten er elles svært nøgd med samarbeidet med Politiet og Kystvakta.

– Dette beslaget hadde vore vanskeleg å fått til utan arbeidet som Tolletaten gjorde i forkant. At vi fekk teke både narkotika og folk samstundes er vi veldig nøgde med, sa han.

Banankassar

Etterpå fekk Ynnesdal spørsmål om det kan ha blitt smugla narkotika til Norge på same måten tidlegare.

– Det er all grunn til å tru at det ikkje er fyrste gong, og heller ikkje siste gong, slo han fast.

Politiadvokat Jørgen Henriksen vart spurd om det er noko lenkje mellom beslaget på Husnes og dei to gigantiske beslaga på hjå Bama i Oslo den siste månaden. I banankassar hjå Bama har det til saman blitt funne over 1600 kilo med kokain.

– Vi ser ikkje sakene i samanheng, sa Henriksen.