Fylte kyrkja med song og publikum

Fredag inviterte «Singing Tweens» til konsert, og fekk både publikum, Ivar Skippervold og barnekoret til Rosendal søndagsskule med på notane.

Svanhill Haugland, som saman med Nelly Kjærland er primus motor for koret, tok oppgåva som konferansier og tekstlesar då det trengtes.

Ho introduserte «Singing Tweens» etter at dei hadde opna songstunda med «Gud er mektig».

– Dei tør å utfordra seg sjølve, og syng soloane. Me får skina litt her i første del av programmet, sa Haugland om dei første songane som uskedalsjentene framførte.

Trylla og song

Med seg på konserten hadde «Singing Tweens» fått Ivar Skippervold, som har bakgrunn både som musikar, barnebokforfattar, lærar, teolog, buktalar og ikkje minst tryllekunstnar.

– Ivar hadde fantastisk kjekk øving, med song og trylling før konserten, kunne Haugland fortelja før ho gav scenen til han.

Skippervold kan kunsten med å framføra og kommunisera med sitt publikum, og kombinerte trylling med song og gitarspel.

– Neste song er ein av mine beste tekstar, og går som følgjer: «Her er vi, tralalala tralalala», innleia Skippervold før allsongen runga.

Han har også laga songsyklusen «Den blinde Bartimeus», som vart framført med Svanhill Haugland som forteljar, og Skippervold og koret på song. Koret var i dette tilfellet utvida med songarar frå søndagsskulekoret frå Rosendal.

I alt husa kyrkja 95 store og små denne dagen, inkludert dei som stod for underhaldninga.

– Vel blåst, konkluderte Nelly Kjærland og Svanhill Haugland etterpå, ein konklusjon som både Skippervold og songarane stilte seg bak.