Fylket svarer på kritikken

Avdelingsdirektør for infrastruktur og veg i Vestland fylkeskommune lover å leggja fram nye tal om økonomien så snart dei faktisk er klare.

I førre kommunestyremøtet i Kvinnherad, vart det retta flengande kritikk mot fylket. Grunnen til dette var at kommunen, etter gjentakande førespurnader, framleis ikkje får utlevert tal eller informasjon om korleis det har gått/ligg an med prosjekta i Kvinnheradpakken.

Grenda har bede fylkeskommunen om kommentar og svar på nokre få spørsmål i samband med kritikken. Dette svarer Dina Lefdal, avdelingsdirektør for infrastruktur og veg i Vestland fylkeskommune

– Kvifor får ikkje Kvinnherad kommune rekneskapstal for Krokaparsellen og dei andre prosjekta i Kvinnheradpakken?

– Me er veldig glade for å kunne opne ny, fin fylkesveg i Krokaparsellen for trafikantane. Dette ville me gjera så fort som mogleg, og sjølv om det står att nokre mindre oppgåver. Først etter at desse er ferdigstilte, har me sluttoppgjer med entreprenør for prosjektet kan økonomisk avsluttast. Me kan difor ikkje seia noko om totalkostnaden i prosjektet no, det er for tidleg.

Men alle referat frå møta i kontaktutvalet er offentlege, her blir status knytt til økonomi i pakken gjennomgått. Kontaktutvalet har representantar frå oppdragsgjevar Vestland fylkeskommune og Kvinnherad kommune, og porteføljestyrer prosjektet.

– Når kan dei eventuelt få desse tala?

– Sidan det står att arbeid i prosjektet, kan me ikkje tidfesta dette nærare no, men me vil leggja dei fram så snart dei faktisk er klare. Me kan ikkje seia noko om tal eller konkludera før alle sluttoppgjer er gjort og kostnadane er mottatt.

– Er det store overskridingar på Krokaparsellen?

– Me ville opna Krokaparsellen for trafikantane så snart det var mogleg, og sjølv om det står att nokre oppgåver. Me kan ikkje seia noko om økonomien i prosjektet før me har hatt sluttoppgjer med entreprenør, så det er for tidleg å sei noko om kostnadane.

– Skuldast den manglande informasjonen usemje mellom fylket og entreprenør?

– Viser til tidlegare svar.

– Kva tykkjer du om karakteristikkane frå politikarane i kommunestyret?

– Me skjønar at kommunestyret er opptekne av fylkesvegprosjekta i kommunen sin, og me skal ha god dialog med dei! Så skal me leggja fram nye tal om økonomien så snart dei faktisk er klare. No er et slik at Kvinnherad kommune og Vestland fylkeskommune sit i lag i kontaktutvalet som styrer pakken og Krokaparsellen økonomisk, etter prinsipp om porteføljestyring og gjeldande økonomisk handlingsrom. Alle referat frå møta er offentlege, også der økonomien blir gjennomgått, og partane står fritt til å informere vidare, svarer Lefdal