Fylket stansar ferjekutta: – Kan med glede melda at det ikkje blir noko av

Fylkesordførar Jon Askeland (Sp) og fylkesvaraordførar Stian Davies (Ap) kunngjorde torsdag ettermiddag at det ikkje blir noko kutt i ferjetilbodet i Kvinnherad eller andre stader.

«Vestland fylkeskommune kunngjer i dag at dei varsla kutta i ferjetilbodet ikkje vert noko av. Som kjent har fylkeskommunane ei stor kostnadsutfordring på kollektivområdet, og denne har vore høgare enn staten kompenserte. På dette grunnlaget foreslo derfor fylkesdirektøren omfattande budsjettkutt for 2025, der særleg kutta på ferjesambanda i Kvinnherad og Ullensvang var dramatiske», skriv Askeland og Davies i ei pressemelding.

Førte fram

Dei fortel vidare at den politiske leiinga i Vestland fylkeskommune i heile haust har leia an i arbeidet med at fylkeskommunane dokumenterte kollektivutfordringa i heile landet.

«Dette førte fram, og før helga fekk Vestland 82 millionar kroner ekstra i kostnadskompensasjon frå staten både i år og dei komande åra. På grunnlag av at den politiske innsatsen lukkast, kunne fylkesdirektøren i dag leggja fram eit justert budsjettframlegg, der ferjekutta er tatt bort. Dette støttar fleirtalspartia i Vestland fylkesting (Ap, Sp, Sv, KRF, V og MDG)», står det i meldinga.

Leverer når det trengs

– Fleirtalspartia i fylkestinget vil sjølvsagt støtta dette, og vi kan med glede melda at dei varsla, dramatiske ferjekutta i Vestland ikkje vert noko av, seier fylkesordførar Jon Askeland i meldinga.

– Det er gledeleg at Ap/Sp-regjeringa har lytta til oss, og leverer når det trengs. Dette viser styrken i at Ap og Sp styrer både regjeringa og Vestland fylkeskommune, supplerer fylkesvaraordførar Stian Davies.

Duoen understrekar at Vestland framleis har ein svært stram økonomisk situasjon, men dei politiske partia kan ikkje uttala seg om andre budsjettspørsmål no. Dei politiske forhandlingane om resten av budsjettet held fram.