Fylket ber om ekstra tilskot til Baroniet
Fylkestinget i Vestland fylkeskommune krev at fleire museum i fylket får eit ekstraordinært driftstilskot i 2024. Bakgrunnen er innskjerpingar og sterk statleg styring.
Det er Riksantikvaren som har skjerpa inn kva kulturmiljø som kan ta i mot tilskot over post 71 i statsbudsjettet, i tillegg til sterk statleg styring av fylkeskommunal tilskotsforvalting. Dette skriv fylkeskommunen på sine sider.
To krav
Annonse
Vidare skriv dei at staten legg føringar for korleis fylkeskommunane skal innrette og prioritere mellom ulike eigarformer når dei fordeler tilskot. Dette har gjort at musea i Vestland som forvaltar freda kulturminne har kome dårleg ut ved årets fordeling, samanlikna med private eigarar av kulturminne og kulturmiljø.
Føringar i statsbudsjettet legg vekt på at kulturminne som er eigde av privatpersonar skal prioriterast ved fordeling av tilskot.
På grunn av dei reduserte tilskota frå staten kjem fylkestinget no med to krav:
*Stiftinga Museumssenteret i Hordaland, Musea i Sogn og Fjordane, Bymuseet i Bergen og Baroniet Rosendal må få eit ekstraordinært driftstilskot i 2024. Og dersom ikkje den statlege tilskotspolitikken blir endra, vil dette kravet i 2025 gjelde alle musea i Vestland som forvaltar freda kulturminne av nasjonal verdi.
Annonse
*Kulturdepartementet og Klima- og miljødepartementet må finne ei permanent løysing som sikrar dei freda kulturminna musea forvaltar.
Sentrale samarbeidspartnarar
– Me kan ikkje sitje og sjå på at musea våre ikkje får midlane dei treng for å ta vare på den viktige kulturarven dei tek vare på for fellesskapen og for framtida. Den sterke statlege styringa av korleis fylkeskommunane skal tildele tilskot har ført til at musea i fylket har kome svært dårleg ut i år, og det må staten rette opp i, seier fylkesordførar Jon Askeland.
Vidare påpeikar han at sjølv om kulturminne eigde av privatpersonar alltid har hatt, og framleis skal fortsetje å ha, høg prioritet ved fordeling av tilskot, så er det likevel slik at ein del komplekse kulturminne som regel berre kan takast vare på gjennom profesjonelle museum eller ideelle stiftingar.
– Me meiner at begge desse er heilt sentrale samarbeidspartnarar dersom me skal lukkast med det nasjonale målet om å ta vare på eit mangfald av kulturmiljø som grunnlag for kunnskap, oppleving og bruk. Me forventar at staten ser dette og både finn ei permanent løysing og løyver ekstraordinære driftstilskot for i år, avsluttar fylkesordføraren.
