Furdal legg opp etter sesongen: – Vi mistar ein artist

– Det blir nok ikkje kontrakt vidare på meg. Eg er nok ferdig som fotballspelar etter sesongen. Det er eigentleg ei god stund sidan eg bestemte meg for, seier Furdal i Vikingpodden.

35-åringen frå Omvikdal var heilt sentral då Viking rykka opp til eliteserien igjen i 2018. Året etter var han med å spelte Viking til cupgull på Ullevaal.

Men sidan august 2020 har midtbaneeleganten slitt med både skadar og sjukdom, og har difor ikkje vore i aksjon for Viking denne sesongen.

– Eg håpar og kryssar fingrane for at eg kan få spela litt mot slutten av sesongen. Men det er langt frå sikkert, seier Furdal i podcasten.

Endeleg skal Johnny leika fotball mot dei beste

– Trist

Sjølv om han legg skoa på hylla når 2021 er omme, vil ikkje Nest-Sotra-legenda og Viking-yndlingen gå ut av fotballen.

– Tanken er at eg skal bli trenar etter karrieren. Kor det blir, det veit eg ikkje endå, seier han til Vikingpodden.

Han vart tidlegare i sommar teken ut til NFF sitt Uefa B-lisenskurs.

Viking-trenar Morten Jensen fortel til Stavanger Aftenblad at klubben mistar ein attraksjon når Johnny Furdal legg opp fotballkarrieren.

– Vi mistar ein attraksjon, ein artist, og det er trist. Han har vore heilt unik for oss og vil bli eit stort sakn i Viking, og i resten av Fotball-Norge. Viking hadde vel neppe rykka opp hausten 2018 utan Johnny på laget, seier Jensen til Aftenbladet.

– Eg har ikkje ord på kor stort dette er