Fullt hus på Naturkafé

– Me sette fyrst fram eit par stolrekker heilt fremst her, men me måtte jo berre fylla på med fleire og fleire stolar etter kvart, sa Mari Teigen Varanes då ho ynskte velkomen.

Det var folk frå heile kommunen som tok turen til Naturvernforbundet sin fyrste Naturkafé. Gjengen i styret har bestemt seg for å samla natur-interesserte folk for slike trivelege arrangement innimellom, for at ikkje naturvern berre skal vera prega av triste saker. Både eit freistande kakebord og musikalsk innslag var med på å setja stemninga.

Kvinnheringar vil ha natur

Det kom likevel eit alvor over forsamlinga då naturfotograf Sigve Solheim fortalte om korleis det står til med fuglebestanden i Kvinnherad. Han vil me skal ta inn over oss kva menneskeleg aktivitet fører til for økosystema rundt oss.

– Me vil ha naturopplevingar. Me vil ha tilgang til urørte fjellvidder, skog, blomar og mykje fuglesong, innleidde Solheim, medan tilhøyrarane fekk sjå flotte naturfoto han har teke.

Gjennom føredraget vart det snakka om ulike naturtypar – skogar, elveløp, fjell, strandsone og sjø – kva fuglar som lever der, og korleis dei vert påverka av menneskeleg aktivitet i områda.

– Eg har vore levande oppteken av fuglar sidan papsen tok oss med på rypejakt på 70-talet. No har eg hengt hagla på veggen, og synest ho passar mykje betre der, fortalde Solheim, og refererte til at rypebestanden har gått dramatisk ned både i Kvinnherad og i Noreg elles.

Jakt er likevel ikkje den aller største trugselen mot fuglelivet, i følgje føredraget hans. Han viste til at mellom anna oppdrettsindustrien har ført til mindre mat for terner og andre sjøfuglar.

– Kraftutbygging fører også til store problem for fleire fugleartar, til dømes lirypa, kongeørna, fossekallen og blåstrupen, kunne Solheim fortelja.

Katten er også eit problem for fuglebestanden; Solheim viste til at rundt 7 millionar fuglar blir tatt av katt årleg. Omtrent like mange fuglar døyr fordi det blir sett opp fleire og fleire bygg i naturen med store vindaugsflater, både hytter og digre utsiktsbygg.

Kanskje provoserande

– Det er umogleg for fuglane å oppdaga vindaugsflatene, dei ser berre refleksjonen av himmel som flatene speglar. Kvifor er det så viktig at me må stå inne og sjå på naturen gjennom eit digert vindauge, når me veit at så mange fuglar døyr av kollisjonen?, spurte Solheim.

Han viste også bilete av korleis sti-dekke, hønsenetting, gamle golvbelegg og trapper forstyrrar område der mellom anna lauvsongarar og heipip-lerka pleier å byggja reir. Dette er kanskje ikkje så kjekt å høyra for engasjerte turfolk som ynskjer å leggja til rette for ferdsle i naturen.

Gjennom heile føredraget fekk ein presentert dilemmaet mellom menneskelege behov, som straum, hytter, vegar og industri, opp mot naturen og fuglane sine behov.

– Kanskje nokon vert provosert av dette føredraget, men det er berre harde fakta og tal eg legg fram, påpeika Solheim.

Trass i det alvorlege biletet som vart presentert i føredraget, melde tilskodarane om at det var ein kjekk og tankevekkande kveld. Flotte naturfoto av Sigve Solheim hang på veggane. Kaffipraten gjekk både før og etter føredraget, og Sindre Aksnes baud på eit flott musikalsk innslag med instrument frå ulike land.

– Det er rett og slett rørande at det kom så mange folk i kveld. Me veit at natur er viktig for kvinnheringane, sa leiar i Kvinnherad Naturvernforbund, som kunne telja 84 frammøtte.