Fullt hus på julemesse: - Trur det må vera ny rekord!

– Me var jo litt spente på om det kom folk, sidan det er siste isdagen og første snødagen. Men det er nesten så eg trur det må vera ny rekord, seier Mette Hvidevold, ei av eldsjelene i velforeininga.

Dei besøkande har mykje forskjellig å velja mellom på handleturen. Her er flust med boder, med både lokalprodusert bakst, lokalhistoriske bøker, mange flotte handverk- og handarbeidsvarer, smykke, kunst, julepynt, kransar og blomar.

Starta bedrift i garasjen

Seljarane er alt frå ungdomar som perlar og heklar som hobby, til privatpersonar med skapande talent, nokon veldedige organisasjonar, og godt etablerte bedrifter. Me tek oss ein prat med nokon av dei.

Lucas Leimanzig presenterer den nystarta bedrifta Yublocks, som lagar produkt av norsk tre, som mobilhaldarar, brikker til glas og vinstativ. Dei starta produksjonen for berre to månader sidan.

– Me har investert i ei maskin som kan skjera ut produkta, og så polerer me, pusser og oljar, forklarar Lucas.

– Har de fått selt noko?

– Ja, det har gått nokon mobilhaldarar og vinstativ, smiler seljarane engasjert.

Ella Marie Nordbø (14) og Ida Kristine Tangeland (13) har perla, laga julepynt, hekla, og laga klinkekule-brett av tre, for å nemna noko. Me ser det er mange som stoppar ved boda deira for å sikra seg eit armband eller noko anna flott.

– Me var på messe i fjor òg, så me har nokon varer att frå då, elles har me produsert alt no i år. Pengane frå salet brukar me til meir perler og garn og sånt som me treng, fortel jentene, før endå fleire kundar strøymer til.

Gratis barnefilm

I kaféen Mussa er kvar stol oppteken. Det er ein jamn straum av kundar ved kafédisken, det er roleg og blid stemning, og folk kosar seg med graut eller kaker. Me registrerer mange barnefamiliar har tatt turen til Kulturhuset denne dagen.

– Me viser jo ein gratis barnefilm her klokka eitt, med Gubben og Katten, og det er det nok nokon som vil få med seg, kan Mette Hvidevold fortelja.

Det er både halsnøybuer og tilreisande blant seljarane. Nede i første etasje, treff me ein gjeng frå Jæren. Mamma Marlen Leidland er utflytta halsnøybu, og dei har hytte på Borgundøy.

– Så me er her nokså ofte, forklarar Elisabeth Leidland.

Elisabeth har starta organisasjonen «Skape muligheter sammen» saman med bror sin og kona hans for ti år sidan.

– Då budde me i Honduras, og me starta opp der med eit prosjekt for å hjelpe lokale born som trong hjelp. No er det lokale folk som driv aktiviteten vidare der nede, medan me samlar inn pengar til dei her heime, fortel ho.

Leidland-gjengen får donert strikkevarer og anna som dei sel til inntekt for organisasjonen sin.

Jobbar nesten dag og natt

Å driva blomebutikk i desember er ein hektisk affære. Men Anne Marie Monssen er like blid, og ler høgt når ho innrømmer at det kanskje er litt få på jobb i butikken på Husnes i dag medan ho står på messe på Halsnøy.

– Men det er viktig å koma oss rundt på desse messene, presentera varene våre og snakka med folk. Det er veldig kjekt.

– Det er høgsesong no?

– Ja, no jobbar me nesten dag og natt. Planen er å vera på messe kvar helg framover. Eg har alt fått unna det meste av julehandelen sjølv, så eg skulle vera klar for desemberjobbinga, ler butikkstyrar Monssen.

Me ser blide kundar og besøkande over alt kor me går, det er ein jamn flyt med folk. Og ikkje minst: Ramma for ei julemesse er perfekt, med den første snøen som eit mjukt teppe utanfor Kulturhuset.