Fullsett sal på kulturfest: For eit fellesskap!

Fredag ettermiddag romma Festsalen på Kulturhuset Husnes fleire hundre personar frå eit stort tal ulike nasjonar, blant desse var det også mange barn, som både leika og dansa saman.

I tillegg til ein rikhaldig buffé med både norsk og utanlandsk mat, var det også internasjonal underhaldning frå scena. Anne Sofie Kjeka og ordførar Hilde Enstad var kveldens konferansierar. Elevar frå valfaget Innsats for andre haldt ein flott tale om TV-aksjonen og kva pengane går til, som i år går til Leger utan grenser og DNDi sitt arbeid for å gi livreddande helsehjelp til dei som treng det mest.

Glade arrangørar

Den kjærkome kulturfesten er i regi av Kvinnherad frivilligsentral, Kulturhuset Husnes, Flyktningtenesta og Vaksenopplæringa. Veronica T. Thorsen i Kvinnherad frivilligsentral kunne fortelja at dette var ein svært etterlengta kveld, både for arrangørane og dei inviterte.

– No er det nokre år sidan me arrangerte denne kvelden, så det var verkeleg på tide. Det er ein kveld der menneske frå ulike nasjonar kan bli kjent med kvarandre, og visa fram kulturen sin gjennom matrettar og underhaldning. Me er både overvelda og glade for alle som har tatt turen. Her er det integrering på høgt nivå, smilte Thorsen.

Utover kvelden underhaldt elevar frå kulturskulen med tøffe dansar, Paulo imponerte med song og afrikansk trommespel, og eit Ukrainsk damekor leverte flotte songar. Kvar einaste opptreden skapte god stemning i salen, der store og små klappa, dansa og song med. For ein kveld, og for eit fellesskap!

Dei som ville, kunne òg bidra med nokre kroner i TV-aksjonsbøssa.