Full(al)pakka program i Kvinnherad Arena

Helga 20.-21. april inntar altså heile 130 alpakkaar storstova, noko alpakkabonde og utstillingskomitémedlem Kristine Heimvik er glad for.

Ope for alle

– Det er jo fyrste gong det blir arrangert på vestlandet, så det er kjekt. No har dei som tykkjer det er litt for langt å reisa heilt til austlandet høve til å bli med på utstilling her. Det er framleis flest dyr på austlandet, men det er absolutt ei veksande næring og talet på dyr veks også her på vestlandet, seier Heimvik.

– Det har jo vore snakk om å få det til på vestlandet ei stund, men det er ikkje så mange stader det er store nok hallar. Men så sendte me ei melding til Daidalos og han tende på idéen med ei gong og meinte at det måtte me få til. Det er me takksame for, og eg trur dette blir kjekt, fortset ho.

Mange har nok frå før høyrt om både hunde- og katteutstilling, og alpakkautstilling vil gå føre seg på mykje det same viset. Hovudpoenget er å kåra det beste og finaste dyret i ei rekkje ulike klassar.

– Dyra er delt inn i klasser etter blant anna både alder og farge. Under dømming vil dyra bli ført ein og ein inn i ein ring der dommaren, som denne gongen kjem frå england, ser på både ull og kroppsbygning, forklarer Heimvik.

– Utstillinga er ope for alle som vil koma å læra meir om alpakkaar og snakka med oppdrettarar, men også viss ein berre vil koma og sjå på dyra. Ein kan også bli med på eit føredrag på fredagen for dei som ynskjer å læra meir. Kurset blir heldt av leiaren av Den Norske Alpakkaforening Britt Vangsnes, legg ho til.

Liten gard

Dagleg leiar for Kvinnherad Arena Daidalos Dahle er glad for mogelegheita til å syna breidden i kva Arenaen kan brukast til.

– Eg tykkjer dette er heilt flott, og sjølv om hallen i all hovudsak blir brukt av skular og ulike typar idrettar, så er det ein bygning som kan brukast til utruleg mykje forskjellig. Når det gjeld alpakkautstillinga så har dei eit proft team som har god regi og som har med seg mykje utstyr. Eg har veldig tiltru til dei ut i frå kommunikasjonen me har hatt i forkant, fortel Dahle.

– Det er klart at det blir lukt av dyr og drift. Hallen blir jo midlertidig ein liten gard akkurat den helga, men me gjer det me kan for at konsekvensane blir minst mogeleg. Det trur eg må får til ganske godt, og heldigvis så er desse dyra svært allergivenlege, fortset han.

Når det kjem til spørsmål om allergi forklarer Dahle i ein epost kva tiltak dei kjem til å gjera for å redusera den negative effekten, spesielt ved bruk av høy.

– Det vert restriktiv bruk av dette i regulerte område, i tillegg vert veggane i båsane tildekte. Me har også eit topp moderne ventilasjonssystem, samt ekstra uttrekksvifter som vert sett i sving. Alle andre rom i arenaen vert i tillegg avstengde heile tida det er dyr og høy til stades, pluss at det er innleigd ekstra reinhald, forklarer han avslutningsvis.