Full rulle på sommarleir
Denne veka har den femte utgåva av sommarleiren Basecamp Kvinnherad gått av stabelen i Uskedalen med eit spenningsfylt og tettpakka program.
22 deltakarar i alderen frå 12-16 år har fått vera med på eit 3-dagar langt friluftseventyr midt i hjarta av Uskedalen. Med lavvo-leir i skulegarden har dei brukt dagane på aktivitetar som klatring, kajakkpadling og «elverafting».
Populært
Annonse
– Det har vore stor interesse for dette, og det har faktisk vore rift om plassane. I år blei det fylt opp med ei gong, og slik har det i grunnen vore kvart einaste år, fortel organisator Sverre Myklebust.
– Tanken min var å tilby noko litt anna enn fotballskule til dei som ikkje tykkjer det er kjekt. Ikkje for å konkurrera, men meir som eit alternativt tilbod, fortset han.
Det heile vart starta på Lindøy like utanfor Stavanger gjennom Friluftsrådet Vest og nestleiar Knut Sørensen, som i fylgje Myklebust er primus motor for det heile.
– Me har samarbeida om å byggja opp ein utstyrsbase. I byrjinga hadde me berre ein tilhengar med nokre kanoar og kajakkar, medan me no har mykje. Knut Sørensen er den som har stått på med å søkja inn midlar til både løn og utstyr, slik at dette blir til, skryt Myklebust.
Annonse
Med på laget for å halda styr på både ungar og utstyr er dei 8 leiarar, der alle er i høgst varierande alder og dei aller fleste er lokale.
– Det er meg og Christoffer Fossli, som har med klatringa å gjera, på om lag 50 pluss, så har me nokre andre yngre vaksne, og i år også nokon på 16-17. Alle er lokale, sett vekk i frå ein. Det er noko med at dei får knytt ein identitet både til bygda og kommunen, fortel Myklebust.
Luksus
På siste dagen for sommarleiren (onsdag) så skin sola med behagelege 20 grader i lufta, noko med-leiar Solveig Haugland er svært nøgd med.
– Det var litt vanskeleg på måndag med regnet som gjorde at klatregruppa ikkje kunne klatra noko særleg, det vart så glatt og sleipt. Så i går var me litt redde for lyn og torevêr for dei som var ute og padla i kajakk, fortel Haugland.
– Men dette er ungar som er friluftsinteresserte, ikkje er dei redde for dårleg vêr og dei hoppar uti og badar uansett. Dei er verkeleg kjempekjekke ungdommar, og veldig pliktoppfyllande. Dei gjer som me ber om kvar gong, utan verken protestar eller sure miner, legg ho til smilande.
Annonse
Både Haugland og Myklebust er enormt takksame til både skulen og idrettslaget for bruk av både skulebygget og idrettshallen.
– Det å ha tilgang til toalett og vatn er heilt fantastisk, rett og slett skikkeleg luksus. Det gjer ting mykje enklare, seier Haugland.
– Korleis er det å ha ein slik sommarjobb?
– Det er kjempestas, og ikkje minst utruleg kjekt at noko slikt blir laga til i heimkommunen min.
