Full rulle hos Hellesøy Verft

Medan ein trailer står og blir lossa av prosjektleiar Trond Egil Huke og ein særs aktiv truck, kjem neste trillande inn på verftsområdet til Hellesøy Verft på Løfallstrand.

– Éin dag hadde me seks vogntog innom. Det kjem til å bli fullt både inne og ute, og truleg må me ta i bruk delar av området vårt på Årsnes også, seier Frank Søllesvik om den ferske avtalen med Boliden.

– Me set enorm pris på at Boliden vel å nytta seg av krefter i nabokommunen sin, legg han til.

Omfattande

Avtalen inneber at dei skal nytta heile verftsområdet til lagring av store mengder utstyr.

– Det er mogeleg det blir montering av utstyret her også. Seinare skal me bringa det inn til Boliden når det er klart. Me har alt ansvar for logistikk, og me skal bistå dei med montering.

Samstundes skal me ha ansvar for å organisera kost og losji for ein god del arbeidarar, noko som gjer at det dryp på andre også. Rosendal Hyttetun og Gjøa har gitt god service på kort varsel, skryt Søllesvik.

Det er fleire underleverandørar til Boliden som Hellesøy Verft no servar.

– Me har vår avtale med Boliden. Dei treng lagerplass og monteringsplass, utdjupar Søllesvik, konsernsjef i Marine Eigedom, som eig Hellesøy Verft.

I praksis jobbar brukar han all si tid på drift, strukturendringar og som altmogelegmann hos Hellesøy Verft.

Trond Egil Huke er prosjektleiar for logistikk og montering på Løfallstrand, og det er den store utbygginga av Boliden Hellesøy Verft no får ta del i.

– Dette er éin av kontraktane me har med Boliden. Me har fleire, forklarer Søllesvik.

Trailerane kjem i stor grad frå Tyskland. Det som blir lagra og eventuelt montert på Løfallstrand, skal på eit tidspunkt til Odda.

– Då blir det vår jobb å få det inn dit, enten det blir sjøvegen eller landevegen me tar i bruk. Men dette er den største kontrakten me har som pågår i Kvinnherad. Me er også inne i Odda og har mannskap utleigd der, seier Søllesvik.

Breidde i oppdraga

For Hellesøy Verft betyr avtalen at dei går frå travelt til travlare. Omtrent all annan produksjon er flytta inn til Årsnes, men mangel på kai på anlegget der, gjera at arbeidet med ein fôringsflåte blir utført på Løfallstrand.

– Me driv eit pilotprosjekt med ombygging av ein flåte, som me trur vil gje oss mange andre oppdrag i tida framover. Me byrjar å bli veldig breie i oppdraga våre, og leverer mellom anna 700 meter rekkverk til Drammen bru, opplyser Søllesvik.

Verftet har siste tida prekvalifisert seg til jobbar for både større bedrifter som Aker, Leirvik og Aibel.

– Dei har vore på området og sett på alt. Sertifiseringar er på plass, så det er god stemning, og det er travelt på alle. Me er 63 no, og kunne vore 35 til. Me skulle definitivt vore fleire sveisarar i både stål og aluminium. Me slit med å få tak i norsk arbeidskraft, men me klarer å rekruttera frå Polen. Det blir rett nok vanskelegare og vanskelegare, det også, slår han fast.

Hellesøy har òg mange reine bemanningsoppdrag, der dei leiger ut personell til forskjellige bedrifter.

Blant oppdraga på heimebane er produksjon av ein stålhall på 3000 kvadratmeter. Det er med på å gje full drift i alle hallane på Årsnes.

– Der er det knapt plass til å koma inn. Me skal ikkje keia oss framover, seier Søllesvik om utfordringane som står føre dei.