Full rulle frå dørene opna

I år som i fjor inviterte byggevarebutikken til ein kjekk dag med hamring og snikring i sine lokale, noko mange såg ut til å setja pris på.

– Her har det vore «bånn gass» og gledeleg kaos heilt sidan me opna klokka ti, akkurat slik det skal vera. Dette er noko som er kjekt for både ungane og foreldra, seier lagersjef Ørjan Teigen medan lyden av hamrar ljomar ikring oss.

Arbeidarane ved Byggern Teigen har brukt i alle fall ti arbeidstimar på å laga klart til heile gilde.

– Til saman har me skore opp 1200 einingar dei siste dagane, fortel Teigen vidare.

Fokus

Borte i arbeidssona er det travel aktivitet på både store og små. Det er ikkje alltid så lett å velja kva ein skal byggja, men dei fleste ser ut til å landa på fuglekasse. Tett i tett står borna saman med sine vaksne. Nokre av borna hamrar det meste sjølv, medan andre hjelper til så godt dei kan.

Ved eine enden av det store bordet står ni år gamle Jakob saman med pappa Magnus Haga og samarbeider om ein fuglekasse.

– Me var her i fjor også, og det var kjempegøy, seier pappa.

Jakob er fullt fokusert på snikringa, men kan kjapt fortelja at han er glad i å snikra.

– Ja, det er kjekt, konstaterer han.

Tvers over bordet står ein annan pappa saman med sine to døtre, Ada (6 år) og Lisa (3 år), også dei jobbar med ein fuglekasse.

– Dette går fint, forsikrar Ada medan ho med full konsentrasjon siktar på den vesle spikaren.

– Ungane hadde lyst til å koma og laga, og det er veldig kjekt, fortel pappa Arild Haga, som syner seg å vera søskenbarnet til den hin pappaen Haga på hi sida av bordet.