Full fart ved Hydro

På innkøyrsla til Hydro Husnes er det til vanleg strenge reglar om fartsgrense og for korleis ein skal parkera. Dei reglane var det derimot ingen som brydde seg om på laurdag. Sjå video!

Då vart det nemleg for andre året på rad skipa til konkurranse i autoslalåm. Arrangør var formelt sett NMK Haugaland (ein gokart-klubb), i samarbeid med NAF Haugesund og NAF Kvinnherad.

– I Haugesund har vi drive med dette i over 25 år, fortalde instruktør Halvor Solbakken frå NAF.

 

Tryggleik

Åtte bilar stilte til start, éin færre enn i fjor. Dei fekk køyra gjennom løypa tre-fire gonger, men berre to av rundane vart teljande. Det vart konkurrert med tidtaking i fleire klassar, men poenget med opplegget var også å slå eit slag for biltryggleiken.

– Deltakarane skal læra å meistra sine eigne bilar, slik at om dei kjem i ein uføresett situasjon, så veit dei korleis bilen oppfører seg, sa Solbakken, som hadde vona på litt fleire deltakarar.

Fyrste mann ut var Sandis Baldins, med ein Honda CRX registrert i Latvia. Han klokka inn på 59,06. Det skulle visa seg at fleire kom under minuttet, i alle fall når dei ikkje køyrde feil eller trefte nokre av kjeglene.

 

120 hestar

Den eldste deltakaren var Hans Aga frå Stord. Han klarte 56,29 på eine runden sin.

– Det er moro dette, konstaterte han etter målgang.

Aga deltok i autoslalåmen på Husnes også i fjor, og reiser ofte til Bergen, Haugesund, Kongsberg og Hemsedal for å delta i liknande konkurransar. Han køyrde sin standard Ford Fiesta med 120 hestar. Så mange hestekrefter er elles det meste ein kan ha i klassen han hevdar seg i.

– Kva tykkjer du om løypa?

– Ho er krevjande nokre plassar, men heilt grei. Det var litt mykje sand, noko ein må rekna med no rett etter vinteren, analyserte han.

Om det ikkje var altfor mange som våga seg ut i løypa, var det godt med folk som kom for å kikka på evenementet.