Full fart i Erslandsparken og Heiakrysset

I oktober starta Brødrene Musland Maskin AS på arbeidet med Erslandsparken på Sandvoll. Vegg i vegg med Skarveland skule skal det i denne omgang etablerast ein liten kunstgrasbane med ei kringliggjande rulleskiløype. Då Grenda var på synfaring tysdag, sat dagleg leiar Roar Musland sjølv i gravemaskina og lasta sprengstein i to store trailerar som gjekk i skytteltrafikk. Steinen blir brukt til ymse ting, mellom anna vert noko nytta på ei hustomt.

Elles på området var det folketomt denne dagen.

– Nett i dag er det berre meg, men vi plar vera to-tre stykke som jobbar her, fortel Roar Musland.

Brødrene Musland har fullført omlegginga av vatn og avløp, og no står kabelgrøfter for tur. Elles held dei på og planerer sprengstein på sjølve banen, før dei skal leggja ut pukk og grus.

– I mai er det snakk om at alt grunnarbeidet skal vera ferdig, opplyser Musland.

Passeleg kontrakt

– Korleis har arbeidet gått?

– Det har gått bra, og alt er etter planen. Det er eit kjekt prosjekt å jobba med, slår han fast.

Det er også eit høveleg stort prosjekt for bedrifta som gjer jobben.

– Ja, det er ein passeleg kontrakt for vår del, og ein fin jobb for firmaet vårt. Verdien er vel rundt 6 millionar kroner, viss eg hugsar rett, seier Roar Musland.

Utbygginga skjer gjennom eit samarbeid mellom Idrettslaget Ternen og Kvinnherad kommune. Brødrene Musland Maskin AS har gjennom fleire år blitt tildelt mange oppdrag hjå sistnemnde.

– Kvinnherad kommune har vore ein kjempegod kunde på alle prosjekt vi har hatt for dei. Vi har eit veldig godt samarbeid med kommunen, rosar entreprenøren, som ikkje er i tvil om at Erslandsparken vil bety mykje for innbyggjarane på Sandvoll og i nabobygdene.

Mykje trafikk

Firmaet har no åtte fast tilsette pluss éin lærling og to innleigde. Dei er ikkje berre involverte i Erslandsparken; også i Heiakrysset like ved Halsnøytunet er det hektisk aktivitet. Der skal krysset utvidast og det skal etablerast busslomme.

– Det er eit kjekt prosjekt, det òg. Men det er jo mykje trafikk der og sprenging av høgt fjell langs vegen. Det har såleis vore meir utfordrande, men alt har gått bra, understrekar Roar Musland.

Også kontrakten på Sæbøvik tok til i haust. Tre-fire tilsette er på denne jobben, og ein reknar med ferdigstilling til ferien. Samstundes har Brødrene Musland endå eit prosjekt; å byggja slamavskiljar for kommunen i Hansalio på Sandvoll. Igjen var det oppstart i haust, medan fullføring skjer dei næraste vekene.

Skogsbilvegar

– Korleis ser det ut vidare framover for dykk?

– Vi har nokre prosjekt på gang. Mellom anna skal vi byggja eit par skogsbilvegar; éin i Handelandsdalen og éin borti Kilen. Vi jobbar også med eit par andre prosjekt. Så det ser greitt ut med arbeid, sjølv om det hadde vore bra å fått noko å rekna på til sommaren, oppsummerer Roar Musland.