Full aktivitet i Skåladalen: – Mellom 300 og 400 vogner skal ut
I førre månad starta tømmerfirmaet Fjordtømmer opp med hogst i delar av skogen i Skåladalen. No er dei klare for å frakta tømmeret ut.
– Me er i gang med å køyra mellom 300-400 tømmervogner frå Skåladalen og ut til tømmerkaien på Børnes. Det medfører ei stor auke i den daglege trafikken derifrå. Lasting av tømmer vil skje i vegbanen og du kan ikkje passera medan det skjer, fortalde skogbruksleiar i Fjordtømmer Tarjei Mikkelsen.
Brøyta og strødd
Annonse
– Dette går på tryggleik. Ynsket vårt er å unngå konflikt og at nokon skal hamna under tømmerbilen eller gå under kranen medan den jobbar. Dersom ein av stokkane fell og nokon får den på seg, så er det over og ut. Éin slik stokk veg altså kring 300 kg. Så det vil me absolutt unngå, understreka Mikkelsen.
Skogbruksleiaren er også klar over at området vert mykje brukt som ynda turstad og for mange spesielt om vinteren til å gå på ski, og beklagar til dei som vert råka.
– Vegen kjem til å bli brøyta og strødd ved behov, noko som dessverre ikkje er godt nytt for langrennsskia. Me vil be alle som bruker Skåladalen til rekreasjonsområde om å parkera med omsyn til tilviste plassar og vurdere Melsdalen som turveg fram til februar. Me beklagar ulempa dette fører med seg, sa Mikkelsen.
