Fugleinfluensa påvist hos høner i Kvinnherad

Dette er fyrste gong Fugleinfluensa er påvist på tamme fuglar i Vestland, opplyser Mattilsynet i ei pressemelding.

Utfrå kartet med vernesone og overvakingssone, ser ein at fugleinfluensaen er påvist ein stad i Husnes/Sunde-området.

Det er påvist smitte på tre av dei åtte fuglane i dyrehaldet. Fem av åtte fuglar døydde i løpet av 1,5 veke. Dei siste hønene var og sjuke og vart avliva av eigaren. Det er sannsynleg at hønene er smitta gjennom kontakt med ville fuglar som er smitta av fugleinfluensa, eller gjennom avføring frå desse, skriv Mattilsynet i pressemeldinga.

Fugleinfluensa er ein alvorleg smittsam dyresjukdom og fører som regel til alvorleg sjukdom og død hos smitta fuglar. Sjukdommen er svært smittsam mellom fuglar. Risiko for smitte til menneske blir vurdert som svært låg.

– Det er alltid trist å få konstatert alvorleg sjukdom hos dyra sine. Dette viser at hobbyhold heller ikkje er trygge for fugleinfluensaen, dessverre, seier , seier avdelingssjef i Mattilsynet Kristin Lervåg.

For å forebyggja at smitta skal spreia seg, har Mattilsynet innført ei vernesone (3 km) og ei overvakingssone (10 km) rundt fuglehaldet i Kvinnherad.

I sonene er det forbod mot å flytte fuglar, rugeegg, konsumegg, fjørfekjøt, fjørfegjødsel og andre produkt som kan bidra til å spreia smitte. Alle fuglar må holdast inne, eventuelt ute under tett tak. Det er forbode å arrangere marknader, utstillingar, konkurransar eller på andre måtar samla fuglar i sonene, og fuglar frå sonene kan heller ikkje delta på slike arrangement utanfor sonene, melder Mattilsynet.

Førebygging

– Vi antar at vi vil måtte leve med smitte hos ville fuglar i framtida. Pass på at fuglane dine ikkje har direkte kontakt med ville fuglar, eller indirekte kontakt for eksempel via avføring frå desse. Dette gjeld anten du har tre høner eller ender i hagen, driv med konkurranseflyging for duer eller dersom du driv eit kommersielt fjørfehold. Det viktigaste du kan gjera for å hindre at fuglane dine blir smitta er å tenke førebygging og smittevern i eitt og alt, seier Lervåg i pressemeldinga.

Registrer ditt fuglehold

– Alle som har høner i hagen eller andre hobbyfuglar må registrera dyreholdet sitt hos Mattilsynet. Registreringa kan gjerast på Mattilsynet sine nettsider. Når fuglehold er registrert kan vi komme ut med informasjon til dei det gjeld. Da er ein med på dugnaden med å hindre videre smitte, seier Lervåg.

Ein blir beden om å melda frå til Mattilsynet dersom du mistenker smitte.