Fryktar for drifta i Fjellhaugen Skisenter

Fjellhaugen Skisenter låg bada i sol då Grenda tok turen i alpinanlegget søndag. Det var ikkje tvil om at denne finvêrsdagen var kjærkomen, både for store og små. Men sjølv om det strøymde på med skiglade i alle aldrar, slit skisenteret med ledige vakter og mangel på frivillige.

– Det var på hengjande håret at me klarte å bemanna anlegget med vakter i helga, og det er frå hand til munn ved kvar opning. Om me ikkje får med oss fleire frivillige, ser me ikkje ei anna løysing enn å stengja anlegget dei dagane me ikkje er nok folk, seier driftsleiar Øystein Svendsen og held fram:

– Me skulle så gjerne halde ope i vinterferien, men det har me rett og slett ikkje personell til. Per i dag har me berre bemanning til kvelds-køyring onsdag denne veka, og til komande helg har eg berre ein frivillig. Det er synd, spesielt for barna som mistar eit slikt lokalt tilbod i ferien sin. Til slike dagar hadde me til dømes hatt behov for nokre spreke pensjonistar.

Treng frivillige, unge som eldre

For å klara å drifta skisenteret, både i vinterferien og generelt, trengs det hjelp av frivillige eldsjeler.

– På lista per i dag har me omtrent ein tredjedel av dei som det er behov for. Me er ein kjernegjeng på ti personar som stort sett stiller opp og tar vaktene, men i lengda blir det tungt, og det er langt frå berekraftig. Eldsjeler brenn seg ut. Om me får med mange nok, blir det kanskje berre vakt kvar tredje helg i løpet av sesongen. Her er alle hjerteleg velkomen til å bidra, unge som eldre. Me bur trass alt i ein kommune med 13.000 innbyggjarar, så det må jo finnast nokon som kan vera med å dra lasset, seier Svendsen.

Driftsleiaren lover at det ikkje er snakk om vanskelege eller krevjande jobbar ­– og at du får opplæring.

– Likar du å bidra for andre, og har interesse for ski, då er du velkomen. Her er det arbeid for alle aldrar. I driftssesongen går arbeidet ut på å hjelpa dei som treng det. Heisvakta passar på køen, og at dei som eventuelt er nye og uerfarne får hjelp til å koma seg på. Elles er det klargjering av anlegget, sette opp gjerde, og sjå over utstyret. Og så er det jo ein del arbeid som ein ikkje ser, som vert gjort utanom sesong. Då er det vedlikehald og oppgradering av anlegget, og der er også frivillige hender hjertelig velkomne.

Sol, snø og sosialt samvær

Denne søndagen var det brørne Adrian (23) og Aleksander Sætre (18) som var heisvakt i barnetrekket. Dei meldte seg som frivillige for ei veke sidan, og vil no oppfordra andre til å melda seg til innsats.

– Det er fantastisk kjekt å hjelpe til her oppe. Her får du sol, snø og sosialt samhald, det kan ikkje bli stort betre. Det er ein ganske enkel jobb, og du får god opplæring. Me passar mellom anna på at det orden i heiskøen, hjelper dei som eventuelt treng hjelp til å koma seg med heisen, og trykkjer på stopp-knappen om det er naudsynt, smiler Adrian medan Aleksander nikkar einig.

Takksame brukarar

I snøen like ved barnetrekket sat det ein familie på fire og nytte sola. Dei hadde teke turen frå Haugesund for å vitja Fjellhaugen denne dagen. Det angra dei ikkje på.

– Eg er oppvaksen på Halsnøy, og har ikkje vore i Fjellhaugen sidan eg var ei lita jente. Det var fantastisk kjekt å sjå at anlegget fortsatt er i drift. Her er det eit breitt tilbod, både for store og små, og det er svært hyggelege og positive folk som driv her. Servicen er på topp, smiler Maria Stormark.

Elvira Johnsen Sjo (8) og familien hadde også tatt turen til Fjellhaugen Skisenter denne søndagen.

– Det er så kjekt å vera her, smiler Elvira medan mor Marlene Johnsen legg til:

– Det er flott at me har eit skisenter i nærleiken, då slepp me den lange bilturen og all planlegginga. Me nyttar oss ofte av alpinanlegget, og det er like kjekt for oss vaksne som for barna. All æra til dei frivillige som gir oss slike dagar som dette.

– Her kan eg både aka, stå på langrenn og slalåm. Eg lærte meg faktisk å stå på slalåm i fjor, og i dag har eg køyrt i vaksentrekket, seier Elvira stolt.