Fryktar at brannstasjon vert lagt ned: – Vil få store konsekvensar

Torsdag kveld møttest tre brannmenn i Uskedalen og utsendingar frå SV, INP, Frp og MDG for å drøfta den siste utviklinga i den etter kvart langvarige saka om brannstasjonsstrukturen i Kvinnherad. Bakgrunnen er at kommunen har bestilt ein såkalla ROS-analyse (Risiko og Sårbarheit). Den er ikkje ferdig enno, men den 4. mars var brannfolka i Uskedalen i digitalt møte med konsulenten som jobbar med rapporten. Utifrå det som kom fram då, meiner brannfolka at konsulenten har fått opplyst ein del feilaktige tal frå kommunen. Han var heller ikkje kjent med Hagatunet som ligg i Uskedalen.

– Brannstasjonsstrukturen var noko av det fyrste vi byrja med i førre periode. Det er gjentakingar og gjentakingar, og det er forstemmande at administrasjonen stadig prøver på omkampar. Vi veit stasjonen i Uskedalen har redda verdiar for mellom 10 og 20 millionar kroner berre ved brannar dei siste åra, sukka Jostein Saghaug (MDG) då møtet starta. Han slo fast at det er «kjempegodt forankra tverrpolitisk i kommunestyret» at ingen stasjonar skal leggjast ned.

– For meg er dette veldig viktig, og noko vi bør sleppa å ta opp annakvart år. Det handlar om tryggleiken vår, meinte Thomas Eide (INP).

Hagatunet

Brannmeister Gaute Moberg og konstablane Stian Haugland og Johannes Haugland understreka at det ikkje berre er Uskedalen som er i faresona; det er også Varaldsøy, Åkra og Fjelberg.

Johannes Haugland fortalde nærare om punkta som troppen spelte inn til ROS-analysen. I regelverket er det definert at sikringsobjekt skal nåast innan høvesvis 10, 20 og 30 minutt. Dei to fyrste SKAL brannvesenet nå på den avsette tida. 10-minuttaren inkluderer institusjonar og tettbebyggelse med fare for rask og omfattande spreiing, medan 20-minuttaren omfattar tettstader. 30-minuttaren BØR brannvesenet nå, og her reknar ein bygg utanfor tettstad.

– Ifølgje kommunen er det ingen institusjonar i Uskedalen. Spørsmålet er om ikkje Hagatunet er ein institusjon med 10-minuttars krav. Dette kan tolkast att og fram, sa Johannes Haugland.

– Også Herøysundet har eit 10-minuttsobjekt, la Gaute Moberg til.

Grensa på Syne

Viss stasjonen i Uskedalen vert lagt ned, er det Rosendal som skal overta ansvaret. Yttergrensa for Uskedalen i denne samanheng går på Syne ved Korsneset.

– I forskrifta står det at brannvesenet frå alarmen går skal vera framme ved brannobjektet innan 20 minutt, opplyste Wermund Vetrhus (SV).

– Korkje brannstasjonen i Rosendal eller den på Husnes rekk fram til Uskedalen på 20 minuttar, vurderte Jostein Saghaug.

Men i følgje brannmennene har kommunen forklart ROS-konsulenten at både Rosendal og Husnes rekk til Uskedalen på 20 minuttar. Difor har uskedelingane sjølve studert utrykkingstidene ved å ta mange køyreturar med stoppeklokke. I tillegg har dei sett på kor lang utrykkingstid kvar einskild av brannfolka i Rosendal har frå heimane sine til stasjonen der i bygda.

– Vi klarar ikkje under 13 minuttar frå Rosendal til Syne. Rosendal når ikkje noko som helst på 20 minuttar, konkluderte Stian Haugland.

Årsaka til at han seier 13 minuttar, er at innbakt i 20-minuttarskravet er fyrst 2 minuttar med telefon og varsling hjå 113-sentralen, deretter 5 minuttar frå alarmen går til personalet har kome seg til stasjonen og køyrd ut porten. Dermed står det berre att 13 minutt på å køyra etter fartsgrensene til Uskedalen.

Ny stasjon

Ifølgje Vetrhus reknar andre kommunar tidskravet frå 20-minuttarsobjektet som ligg lengst vekke i innsatssona. Det same gjer politiet. I Uskedalen blir det Børneset for Rosendal brannstasjon.

– Når saka kjem til politisk behandling, så må talgrunnlaget vera korrekt, sa Silje Nordtveit Olsen (SV).

– Skal vi fatta best mogleg vedtak, er vi heilt avhengige av rett informasjon, støtta partikollega Hildegunn Hanstvedt Tofte.

– Dette skapar heile tida uro hjå oss, for vi får ikkje fokusera på det vi eigentleg skal, meinte Stian Haugland.

Dei siste åra har både Rosendal, Ølve, Husnes og Halsnøy fått nye brannstasjonar. Viss dagens struktur skal oppretthaldast, må også Uskedalen, Åkra, Varaldsøy og Fjelberg få det. Årsaka er strenge krav frå Arbeidstilsynet. Men troppen i Uskedalen meiner det på langt nær treng bli så dyrt som kommuneadministrasjonen har skissert for kommunestyret. Karane har sjølve fått utarbeidd ei skisse for ein stasjon på 15x26 meter, med plass til to bilar, både dame- og herregarderobe, rein og skiten sone.

I tilfelle pes

Det er elles åtte tilsette i Uskedal branntropp.

– Vi er fulltalige ifølgje kommunen, men kravet er eigentleg 10 tilsette, avslørte Stian Haugland.

Viss stasjonen blir lagt ned, vil deira kompetanse gå tapt, for grunna tidskrava kan dei ikkje melda seg til teneste hjå andre stasjonar.

– Veldig flott at de er på! De er veldig opptekne av å få ein god brannstasjon for å levera gode tenester. Kjempebra, roste Silje Nordtveit Olsen etter møtet.

– Det er viktig at denne saka blir belyst. Viss det blir pes på dåke som tilsette i kommunen for at de går ut i avisene, så vil vi gjerne ha beskjed om det, understreka Jostein Saghaug.

– Vi toler litt pes, smilte brannmeister Moberg.