Frivilligsentralen og BUA til Rosendal

– Vi har jo ein veldig langstrakt kommune, og vi ynskjer å gjera tilboda meir tilgjengeleg for alle i Kvinnherad, fortel dagleg leiar i Frivilligsentralen, Veronica Thorkildsen Thorsen.

Per i dag er ikkje Frivilligsentralen ein eigen avdeling i kommunen, men no skal den bli det, og i det høvet søkjer dei etter ein avdelingsleiar. Avdelingsleiaren vil ha ansvar for begge sentralane, og det har allereie vist seg å vera ein populær jobb.

– Vi har nett lagt ut annonsen, så vi har ikkje fått nokre søknader enno, men vi har fått masse telefonar. Det er mange som er interesserte, noko som er kjempekjekt, seier Thorsen.

I tillegg til å søkja etter avdelingsleiar søkjer dei no aktivt etter eit lokale som kan husa både Frivilligsentral og BUA avdeling Nord.

– Vi ynskjer å vere i eller nær Rosendal sentrum, og vi har allereie eit tilbod om lokale, men lyser det ut no slik at alle som vil kan tilby, seier Thorsen, og legg til;

– Det er vanskeleg å seie eksakt kva tid vi opnar, men vi håpar å koma i mål med det før sommaren.

Vil etablera BUA i Rosendal

BUA

BUA er ein utstyrssentral der hovudsakleg barn og unge, men også andre, kan låna seg utstyr til sport og andre aktivitetar gratis. Det finnest 227 BUAr rundt om i Noreg, fordelt på 175 kommunar. På Husnes har konseptet vist seg å vera kjempepopulært.

– Vi har ein av dei mest brukte BUAne i Noreg. Heilt sidan vi starta har vi vore på topp 20 gjennom fleire rundar, fortel Thorsen.

Når dei no skal utvida, håpar Thorsen at det kan gjere det lettare for dei som bur inst i kommunen å nytta seg av tilbodet.

– Vi gler oss veldig til dette. Det visar eit klart behov, men òg velvilje frå kommunen når det kjem til frivilligheit, noko som er veldig kjekt, avsluttar ho.

BUA Kvinnherad på topp-10 utlånslista

Frivilligsentralen delte ut presangar og matkassar