Frivilligsentralen delte ut presangar og matkassar

Stablane med matkassar fylte heile inngangspartiet, og nye kassar og handlenett fulle av matvarer vart leverte på løpande band, den tida Grenda var innom.

Både frå Spar Sæbøvik på Halsnøy og Bunnpris på Husnes kom det leveransar medan me var der, og Veronica Thorkildsen Thorsen, Dani Morgenstern og Anja Thunold, alle tilsette ved Frivilligsentralen, var på plass og tok gledeleg imot.

– Det er kome inn kring 526 julepresangar, og det kjem enno fortløpande inn ønske om gåver frå folk, sa Veronica Thorkildsen Thorsen.

– Mellom 470-480 personar får matkassar, og me merkar klart ein auke i behovet frå tidlegare år, fortsette ho.

Behova er melde inn via tenester som blant anna Nav, barnevernet, rus og psykiatri, heimetenester og sjukeheimar. Det er representantar frå desse tenestene som kjem og hentar presangane og matkassane, for så å fordela dei vidare.

Hemmeleg julenisse

Veronica fortalde at Frivilligsentralen har fått rause gåver frå både privatpersonar, bedrifter og Sparebank1-stiftinga.

– Me fekk først 200.000 kroner frå Sparebank1-stiftinga til matkassane. Då dei fekk høyra om det auka behovet, gav dei 250.000 kroner til, sa Veronica.

Ein privatperson har også gitt så rause gåver anonymt, at Frivilligsentralen omtalar denne personen som «Secret Santa», eller på godt nynorsk, «Hemmeleg julenisse».

– Denne personen har gitt gåvekort for til saman 136.000 kroner på Husnes Storsenter, som me får leggja oppi matkassane, fortalde Veronica.

Mange butikkar har levert matkassar

Det er åtte butikkar, frå Valen via Husnes til Halsnøy, som har vore med og laga til matkassar. Frå Spar Sæbøvik var Bjarne og Sverre Bjørnevik på tur med kvar sin varebil full av varer.

– Kva tenker de om å vera med på dette? spurde me Bjarne Bjørnevik.

– Me synest det er kjekt å vera med, og bra at det finst ei slik ordning. Men det er sjølvsagt trist at det er behov for det, svara Bjarne, og peika på at det er onkelen Sverre som har gjort mesteparten dette året, då Bjarne og kona nyleg er blitt foreldre.

Sverre fortalde at dei hadde pakka fire kassar til kvar familie, og at det var matvarer til mellom fire og seks personar i dei.

– Det er litt av kvart i kassane, mange middagar, pålegg og sjølvsagt godsaker som snop og frukt. Det høyrer jo med. Det er også kassar med vegansk innhald, sa han.

Takkar

Dei tilsette ved Frivilligsentralen ønskte å takka alle som hadde bidrege med ulike gåver, både privatpersonar og bedrifter, den hemmelege julenissen og Sparebank1-stifitinga.

– Og så vil me gje ei stor takk til elevane som har hjelpt til. Både elevar frå faget «Innsats for andre» og 10. trinnet ved Husnes ungdomsskule har vore her og hjelpt til med å pakka inn presangar. Også elevar frå faget «Innsats for andre» ved Rosendal ungdomsskule har hjelpt til med å laga pakkelappar, sa Anja Thunold.

– Og mange frivillige utanom har også hjelpt til med ulike ting, la Veronica til.

– Utan hjelpa frå alle desse hadde me ikkje klart dette, stemte dei tre tilsette unisont i med til slutt.