Friluftslivets år 2025

«Dette er ein god mogelegheit til å gje friluftslivet lokalt eit solid lyft. Auka aktivitet innan friluftsliv har mange fordelar. Det kan gje betre livskvalitet for mange, mellom anna fordi det fremjar både fysisk og psykisk helse. Ein viktig målsetjing med året er at enno fleire oppdagar friluftslivet som kjelde til helse og livskvalitet, og fortset med eit aktivt friluftsliv på eiga hand også etter at året er over», skriv Bjelland Eriksen.

Statsråden skriv vidare at målet med prosjektet er å inspirera flest mogeleg til å oppleva naturen der dei bur og at alle skal kunna finna arrangement og aktivitetar som dei ynskjer å delta på. Naturvennleg friluftsliv og frivilligheita i friluftslivet er òg i fokus.

Året blir offisielt opna den 18. januar med arrangementet «Hele Norge båler» og statsråden oppfordrar kommunane til å kontakta lokale lag og organisasjonar for å planleggja både opningsarrangementet, samt tiltak og arrangement i året elles. Det kan vere varige tiltak som kan bli nyttiggjort av innbyggjarane i åra som kjem.

På Norsk Friluftsliv sine sider står det at målet for Friluftslivsåret 2025 er at alle skal finna si eiga friluftsglede.

– Å leggja til rette for naturopplevingar for alle, uavhengig av kven dei er, kor dei kjem frå og kva dei kan frå før, er eit unikt verkemiddel for å fremje både inkludering og god folkehelse i befolkninga utan at det treng kosta mykje, seier generalsekretær Bente Lier i ei pressemelding frå Norsk Friluftsliv.

Du kan lesa meir om Friluftslivets år på Norsk Friluftslivs sine heimesider.