Fremja regionale saker i hovudstaden

Sunnhordlandsrådet var tysdag og onsdag i Oslo å løfta fram viktige saker for regionen.

På programmet stod møte med Hordalandsbenken, samt Arbeids- og inkluderingsdepartementet, Barne- og familiedepartementet, Energidepartement, Helse- og omsorgsdepartementet, Justis- og beredskapsdepartementet, Kommunal- og distriktsdepartementet, Kultur- og likestillingsdepartementet, Næring- og fiskeridepartementet og Samferdselsdepartementet.

Konstruktive samtalar

Delegasjonen bestod av ordførarar og kommunedirektørar frå Austevoll, Bømlo, Etne, Fitjar, Kvinnherad, Stord, Sveio og Tysnes, samt dagleg leiar i Sunnhordlandsrådet Tora Haslum Myklebust.

«Over to dagar har dei drøfta ei rekkje tema med stortingsrepresentantar og statsrådar. Målet med møta var å fremja sentrale saker som påverkar Sunnhordlandsregionen og bidra til konkrete løysingar for lokal og nasjonal utvikling. Dei folkevalde og leiarane i Sunnhordland la fram ei bredde av saker som representerer innbyggjarane sine interesser, og hatt konstruktive samtalar som legg grunnlaget for betre vilkår for regionen», heiter det i ei pressemelding frå Sunnhordlandsrådt.

Avhengige

Det vert understreka at Sunnhordland har sterke næringar, eit rikt kulturliv og stor vilje til vidare utvikling.

– Likevel er vi avhengige av støtte frå sentrale styresmakter for å løysa dei utfordringane som påverkar kvardagen til innbyggjarane. Den årlege turen til Oslo er difor ein viktig arena for å synleggjera desse sakene. Det var òg i år svært kjekt å møta både statsrådar, statssekretærar og stortingsrepresentantar som verkeleg syner interesse for det vi bringer til torgs, seier André Mundal Haukås, leiar i Sunnhordlandsrådet, i pressemeldinga.

Nokon av temaa som vart fremja er behovet for betre vegar, eit auka kraftbehov, betre helse- og omsorgstilbod, havbruksmeldinga, ferjeavløysingsmidlar, reiselivet sine interesser og inntektssystemet til kommunane.