Fransk investor inn i Hardanger Biogass

Swen Infrastructure for Transition 2, også kalla Swift 2, er eit fransk forvaltningsfond som går inn med monaleg finansiell støtte til bygginga av biogassanlegg på Husnes og Lista.

Dagens Næringsliv skreiv søndag at investeringane som skal gjerast i Kvinnherad og på Lista er på kring 600 millionar kroner totalt. Det stadfestar Vireo-sjef Reinhard Lund-Mikkelson til Grenda.

– Dette betyr at me er i full gang med prosjekteringa av anlegget, og har pengar til å fullføra prosjektet, seier han til Grenda.

49 prosent

Lund-Mikkelson sendte tysdag ut ei pressemelding om at dei har fått investorane Swift 2 med på laget. Der går det fram at fondet vil støtta bygginga av ein planlagt kapasitet av biogass på 165 gigawattimar energi i året. Til Grenda utdjupar Lund-Mikkelson:

– No veit me at me får fullført investeringane som må gjerast. Me har fått Enova med oss, og no også investorar som har djupe nok lommer til å fullføra etableringa. Det siste halvåret har me vore trygge på at dette ville bli realiteten, men det tar tid å landa dette, seier Lund-Mikkelson.

Swift 2 blir minoritetseigar i Vireo med 49 prosent eigarskap i selskapet. Lund-Mikkelson vil ikkje ut med kor mykje det franske selskapet kjøper seg inn med, men meiner partnarskapet blir viktig på fleire vis enn med dei reine pengane dei bringer til bordet.

– Me har god kjemi med dei, dei jordnære og ein god treff for oss. Dei kjem med meir enn kapital, dei har nettverk og eigne biogassanlegg, dei kan faget og kan læra oss mykje. Dei skjønar risikoen, dei veit kva dei går i. Det er bra at ein no har tryggleiken til å vita at me får fullført dette, utdjupar Lund-Mikkelson.

– Veldig tilfredse

Investeringa i Vireo er den førte det franske fondet gjer i Norge. I pressemeldinga seier administrerande direktør SWEN Capital Partners Olivier Aubert at dei er veldig tilfredse med å koma seg inn i Vireo og den norske marknaden.

– Me trur Norge er motiverte for å no sine ambisiøse nullutsleppsmål, og har stort potensial for fornybar kraft. Me ser fram til å jobba med Vireo på dette svært lovande partnarskapet for å få fram berekraftige løysingar, skriva Aubert i pressemeldinga.

Vireo AS eig Hardanger Biogass, som skal inn i den grøne næringsparken på Husnes, og Lista Biogass i Farsund kommune. Grenda Huset as, Myklebustdalen Bioenergi as og Lumire as eig alle kvar sin sjettedel av holdingselskapet bak Vireo før det franske fondet kjøper seg inn i det.