Frank Søllesvik leiar industriselskap

– Eg skal bidra der dei treng meg i drifta, seier Frank Søllesvik om si rolle som dagleg leiar for Marine Eigedom.

No er det formelt Marine Eigedom, som er morselskapet for blant anna Hellesøy Verft og Rosendal Marineservice, Søllesvik er tilsett gjennom. Dette er eit selskap han sjølv har eigarinteresser i.

– Marine Eigedom kjem til å få ein paraply med 10-12 bedrifter i Kvinnherad, på Stord og Haugesund-området under seg, fortel Søllesvik, utan å villa avsløra kven alle dei ulike bedriftene er.

Frå Reco

Søllesvik var ein del av Kvinnherad Bygg fram til 2012, då han starta opp med S. Prosjekt. I 2017 kjøpte Reco bedrifta, og gjorde det til ei lokalavdeling i Reco, med Søllesvik som leiar. I 2020 vart han henta til konsernleiinga i Oslo. No er tida i utanriksteneste og byggebransjen over, og Årsnes, Hellesøy Verft, Rosendal Marineservice og fleire andre bedrifter blir arbeidsstaden framover.

– I Reco hadde eg ansvar for all drift, og 220 tilsette. Det er litt mindre forhold her, men me trur me kjem til å ha rundt 50 i arbeid her på Årsnes når året går mot slutten, seier Søllesvik.

I Reco fekk eg jobba med folk frå heile landet, og eg har lært utruleg mykje. Eg kunne ikkje tatt på meg denne jobben utan den erfaringa og lærdommen eg fekk i Reco, understrekar Søllesvik.

Utvikla industriområdet

På den spennande sida kjem at Rosendal Marineservice, som på eit eller anna tidspunkt skal flytta aktiviteten til Årsnes, har utvikla sin eigen røktarbåt. Denne vil dei ut i marknaden og promotera og selja til oppdrettsnæringa.

– Hellesøy Verft har også mykje nyutvikling føre seg, spesielt inn mot oppdrettsnæringa. I dette kjem også sveising og produksjon i aluminium, fortel Marine Eigedom-leiaren

Det er den tidlegare Norsafe-eigaren Aleksander Skaala som leiger industriområdet på Årsnes til Marine Eigedom.

– Me leiger stort sett heile området her no, og skal utvikla det vidare i saman med eigaren. I det ligg også at det skal investerast i området her, forklarer Søllesvik, og viser mellom anna til ønske om endå ein hall i den søre delen av industriområdet.

Marine Eigedom-sjefen melder at alle bedriftene deira i industrien satsar på lærlingar, og at dei tilsvarande er på leit etter rekruttering til å utvida arbeidsstokken sin.

– Det er ein heilt ny bransje for meg, sjølv om me leverer litt til byggebransjen. Det er mykje å setja seg inn i, og eg kjem til å både få og stilla mange spørsmål, men det er primært drifta og folket eg skal ta vare på, sluttar Frank Søllesvik.