Frå teiknebrett til flett ferdig modell

Sit du og blar i den siste utgåva av huskatalogen til Vestlandshus, kjem du plutseleg over huset med namnet «Melderskin». Eit hus Caroline Lie frå Sunde er arkitekten bak.

Etter at ho i september i fjor trollbatt juryen med sitt bidrag i Vestlandshus sin teiknekonkurranse, har den kreative sjela jobba tett med husbyggjarane frå Vestlandet for å ferdigstilla illustrasjonar og teikningar til ein komplett modell.

– Det har vore utruleg artig og lærerikt å vera med på. Og så er det jo veldig gøy å no sjå det ferdige produktet. Særskild når det blei så bra som det faktisk blei, seier Lie på telefon frå Grimstad.

For sjølv om det er Vestlandshus som har lagt siste hand på verket, er det Caroline Lie sine idear og teikningar alt er basert på. Og arkitekten sjølv er stornøgd med det som no er på trykk i katalogen.

– Det vart så bra. Dei har verkeleg klart å ta vare på dei trekka eg la vekt på i mine skisser. Eit godt hus med gode planløysingar. Eg har fått vera med på heile prosessen, og synest dei har klart å setja prikken over i-en på det eg leverte frå meg og vidareutvikla det til eit strålande hus, seier ho.

Ein draum

Ho omtalar det som ein draum å få vera med i katalogen. Men den største draumen er å få sjå sine teikningar i form av eit ferdigbygd hus.

– Det hadde vore så fantastisk. Og det einaste som trengst er jo ein kunde som likar huset og har lyst til å kjøpa det. Så eg både trur og håper at det kjem til å bli bygd, seier ho.

Caroline har alltid vore interessert i teikning, og har ein stor og tydeleg lidenskap for hus og interiør. Noko ho dokumenterer godt med sine følgjarar på Instagram. Og når ho no har fått vera med i ein slik prosess som dette, har det sjølvsagt gjeve meirsmak.

– Utan tvil. Dette er noko eg likar å halda på med. Det er nesten slik at eg kan snakka om hus og interiør non-stop, så dette er noko eg verkeleg brenn for. Om det er nokon der ute som har spørsmål eller ynskjer hjelp til ulike ting når det kjem til moderne hus, er det sjølvsagt berre til å ta kontakt, seier ho.

Eit naturleg namneval

Ei av dei mange avgjerslene Caroline fekk ta del i, var valet av namn på huset. Og sjølv om ho er glad i Grimstad, står framleis Kvinnherad hjarta nært. Difor var det ikkje vanskeleg å bestemma seg.

– Med kriteriet at namnet måtte vera eit fjell, så var eg aldri i tvil. Det måtte bli Melderskin. I tillegg til at det var viktig for meg at namnet var frå Kvinnherad, så passer Melderskin godt til huset. Det står der majestetisk og estetisk vakkert. Så det passa perfekt og var eit naturleg namneval, sluttar Caroline Lie, som no gler seg til å sjå om folk rundt om i landet ynskjer å byggja huset ho står som arkitekt for. Og i følgje Vestlandshus har etterspurnaden allereie vore stor.

– Vi har fått mange førespurnadar om huset Melderskin etter at vi lanserte huskatalogen vår for vel éi veke sidan. Det viser at både vi og Caroline har treft godt på kva kundane faktisk ynskjer i dag, seier marknadssjef Jim Hansen i Vestlandshus.