Frå heimebuande eldre til årsturnus

Budsjettet som vart vedteke på torsdag, inneheld åtte såkalla verbalpunkt. Desse omfattar både signal til kommunedirektøren og krav om utgreiingar. To av punkta har Grenda skrive eigne saker om; helsesentertenester i Rosendal og omsorgstilskot for barn mellom 13 og 19 månader. Her er ein oversikt over dei seks andre verbalpunkta.

* Eldre som bur heime:

Kommunedirektøren får i oppgåve å gjera ei utgreiing med sikte på at fleire eldre skal kunne bu og trivst lengre heime. Utgreiinga skal leggjast fram for Kommunestyret innan oktober 2025.

* Satsing på lærlingar:

Kvinnherad kommune skal ha som mål å ha to lærlingar per 1000 innbyggjar. Dette må jobbast med kontinuerleg for å sikra kompetanse og folketalsauke.

* Heiltid og sjukefråvær:

I 2022 viste tal at 47,6 % av dei tilsette i Kvinnherad kommune jobba heiltid. I 2023 var det 49,7 % tilsette som jobba heiltid. Ved utgangen av 2025 skal heiltidsgraden vere minimum 53%. Ved utgangen av økonomiplanperioden er det mål om at heiltidsgraden skal vere minst 60%.

Kommunestyret har som mål at det totale sjukefråværet i Kvinnherad kommune vert redusert med 1 prosentpoeng årleg i økonomiplanperioden.

* Kommunale næringseigedomar:

Kommunedirektøren får i oppdrag å utgreia moglegheita for å organisera kommunen sine næringseigedomar i eit heileigd kommunalt aksjeselskap. Utgreiinga skal leggjast fram for Kommunestyret innan juni 2025.

* Kommunale bustader:

Kommunedirektøren får i oppdrag å utgreia moglegheita for å organisera kommunen sine bustader i eit heileigd kommunalt aksjeselskap. Målet er å leggja til rette for ei meir aktiv forvaltning av kommunale bustader, auka byggeaktiviteten og styrkja den langsiktige forvaltninga av eigedomsmassen. Saka skal leggjast fram for Kommunestyret innan utgangen av juni 2025.

* Årsturnus:

Årturnus er ein god og viktig reiskap for planlegging av arbeid som går over heile døgnet, heile året. Kvinnherad kommunestyre ber om at einingar med slik aktivitet innfører årsturnus.