Frå byliv til idyllisk hytteliv

Ein måndag føremiddag vart den utsendte frå Grenda plukka opp av familien Kirkhus på Sydneskaien. Trass i regnveret, var det ein inspirerande og idyllisk dag. Ferieidyll i den norske skjærgarden er draumen for mange. John og Caroline realiserte denne draumen då dei i mai kjøpte hytta på Sydnesøy.

Paret bestemde seg for å reisa på visning då dei såg hytta til sals. Dei fall pladask for staden. Caroline litt tidlegare enn John, for allereie på veg opp til hytta, langs skogvegen, kjente ho at dette var det rette. Hytta ligg eit steinkast frå sjøen, men samstundes er den omringa av skog og mark. Caroline kjem opphavleg frå Telemark, og på hytta følar ho seg som heime.

– Då me kom til denne staden var det omtrent som å koma heim att til Telemark. Med det meiner eg med både skog og sjø like utanfor dørstokken. Staden gir meg ei skikkeleg skjærgards-kjensle, og det var viktig i søket etter den perfekte hytta. Det er også mykje liv og røre på denne øya, og det minnar meg om heimstaden min. Helst ville eg hatt endå fleire naboar rundt meg, for det er så koselig å treffa folk her, smilar Caroline.

Hytteparadis

No er det fem månadar sidan hytta vart kjøpt, og paret har lagt ned mykje tid og energi på oppussing. Sjølv om John og Caroline har travle arbeidsdagar, han som ingeniør og ho som faglærar, har dei verkeleg forvandla staden til eit hytteparadis. Golvet er slipt og lakka, panelet er malt, veggar er slått ned, og nytt kjøken er på plass. Innimellom slaga har dei også malt hytta utvendig med tre strøk.

– Alt handlar om å vera strukturert. Det er også viktig å finna ein balanse, og det føler eg me klarar fint. Når me fyrst stoppar opp med oppussinga, kosar me oss skikkeleg her på hytta. Då fiskar me eller set teiner, køyrer båt til Fjelberg for å kjøpa is eller til Stord for ein betre middag. Me er omringa av mange flotte plassar, fastslår John.

Men hyttelivet er ikkje alltid like idyllisk og avslappande. John og Caroline har fått testa grensene, tolmodet og kanskje forholdet, då båt er det einaste moglege framkomstmiddelet.

– Me ser jo litt sjarmen i det, men eg må innrømma at det har vore eit slit. Det var jo ein del gamle møblar her frå før, mellom anna ein bod full i ting og tang, sofa og senger me har måtta frakta til fastlandet. I tillegg har me jo måtta frakta ein god del material. Me har nok sett litt galne ut med ein fulllasta liten båt, med eit kjøleskap så vinglar over fjorden, ler John.

Materiale har dei kjøpt hos forskjellige byggjeforhandlarar i området.

– Me må skryte litt ekstra over servicen på Øybygg på Halsnøy. Dei er svært flinke, tilbyr gode rabattar og svarar raskt om me lurar på noko, smiler Caroline.

Kunst og handverk

Caroline har alltid likt å vera kreativ, og har ei stor interesse for interiør og «do it yourself» prosjekt. Som nemnt er ho faglærar på Hauge skule i Haugesund, der ho underviser i kunst og handverk. Det kommer godt med i hytteprosessen.

– Eg likar svært godt å laga ting sjølv, og eg har ei stor interesse for interiør. Alt innan form og fargar er kjekt. Me har mellom anna snikra ei day-bed på terrassen, og eit ute-kjøken. Det er skikkelig morosamt å halda på med, fortel ho.

– Og eg gjer berre så eg får beskjed om. Eg syns alt er kjekt, berre eg får lea på meg. Eg likar ikkje å sitja i ro, skyt John inn og legg til:

– Sant må seiast, me er eit utruleg bra team. Caroline er svært handy og sterk. Og me begge har eldre foreldre, så me løftar tungt og gjer alt sjølv. Me tek det som ein trim, så er det jo kjekt å få det akkurat slik me ynskjer det.

Det enkle hyttelivet

Med to barn og ein hund handlar feriedagane om å finna ro og vera saman. Det enkle hyttelivet gjer at familien vil bruka hytta så ofte dei kan. Dei har allereie planane klare for vinteren.

– Me ynskjer jo å vera her så ofte me kan. Difor legg me ned mykje arbeid i å få det slik me ynskjer. Me skal mellom anna feire førjulsdagane her, med juletre og familiekos. Det gler me oss veldig til, seier Caroline.

Paret fortel at målet heile tida har vore å skapa ein stad der dei, og gjestene kan kopla av. Sjølv om hytta berre ligg ein time unna med bil frå Haugesund, er det for familien som å koma til ei heilt anna verd.

– Når eg innreiar hytta ynskjer eg å få inn skog, men også innslag av sjø. Eg nyttar meg difor av lyse og lette farger, med møblar i treverk og mellom anna skjell som dekor. Slik går det i eitt med omgivnadene rundt oss, og det blir ei lun og koseleg stemning i hytta, fortel Caroline.

Store planar

Hytta frå 1995 er som nemnt blitt eit hytteparadis. Men familien har endå fleire planar.

– Me skal mellom anna lage til eit vaskerom i hytta, skyvedører mot sjøen, setja opp glasrekkverk, byggje ny trapp og brygge, samt legga platting. Så ynskjer me oss ei flaggstong, og då treng me plen også, ler John.

– Me skal og laga til smart oppbevaring nede på brygga, slik at all ustyr kan bli ståande ute heile vinteren, informera Caroline.

Hytta står på ei tomt som er rett over eitt mål. Ved sjøen ligg det båtar som raskt tek familien inn til øyane som ligg rundt.

– Det er så koselege plassar i området, mellom anna Halsnøy, Fjelberg, Skånevik og Stord, seier Caroline.

Med sjøen like utanfor, er bading blant dei mest populære aktivitetane. Sonen Elliot (6) likar seg best i stranda på nordsida av øya, og storebror John Theodor (10) køyrer båt og dykkar.

– Eg elskar å vera på hytta. I går fann eg krabbar i stranda, og i sommar har eg bada mykje, smilar Elliot medan John Theodor skyt inn:

– Og eg brukar mykje av tida mi på sjøen. Eg likar godt å køyre båt, og på sommaren fridykkar eg. Målet mitt er å dykka endå djupare ned, men det får bli til neste sommar, no er det litt for kaldt.

Fuglekvitter

Sjølv om (sjø)vegen ikkje er lang frå bylivet til hytta, skjer det ein mental forandring når familien kjem ut til denne perla.

– Ei kjensla av glede og ro slår oss når me legg båten til brygga. Om morgonen skin morgonsola, og i og med at me er på ei øy, vaknar me anten opp av fuglekvitter eller båtar som køyrer forbi. Det er medisin for sjela, smiler Caroline.

Det er ein harmonisk og kjærleg familie som verkeleg har funne sin draumestad. Ein familie som utstråla både energi og glede for kvarandre, men også for naturen rundt seg. Etter ei koseleg stund vert den utsendte frå Grenda frakta attande til fastlandet, full av nye og idylliske inntrykk.

Ein kan lett bli inspirert av Caroline sine kreative løysingar og idear. Om du ynskjer å følgje familien Kirkhus vidare i hytteprosessen, har Caroline eigen Instagramkonto kalla «Fruaivest». Her tek ho deg med på ei koseleg hyttereise, kor ho delar både små og store prosjekt.