Fotball heile dagen

Laurdag inviterte Trio til cup i Husneshallen. 15 gutelag og 10 jentelag var med på å fylla hallen frå tidleg morgon til sein kveld.

Gutane var først ut, der G15- og G16-lag var samla i ein klasse. Odda, Moster og Rosendal deltok, og arrangørklubben stilte med heile fem lag, der to av dei tok seg til semifinalane. Trio-1 måtte ha straffesparkkonkurranse for å senda Odda heim gjennom Folgefonntunnelen og seg sjølv til finalen. Trio-2 tapte tilsvarande tevling for Rosendal-2, etter at semifinalen deira enda mållaus.

Finalen vart tett og intens, og gutane var til dels merka av at dei hadde vore i sving lenge før den avgjerande kampen. Lars Olderkjær Larsen sette inn det einaste målet i finalen, etter skarpt førearbeid av Brynjar Gjerding.

Jentene overtok parketten då dag vart til ettermiddag. J15- og J17-lag frå Rosendal, Halsnøy og Odda var med. Det baud på minst tre kampar til kvart lag, og verdifull konkurransetrening tidleg i sesongen.

I finalen stod Halsnøy 2 og Rosendal Raud på kvar sin banehalvdel. Her vart Kristine Lygre sitt einaste mål avgjerande. Det var, i følgje heimesida til IL Trio, det siste ho gjorde før ho meldte overgang frå Halsnøy til Stord.

På vinnarlaget til Trio i guteklassen var Tarmo Tars, Lars Olderkjær Larsen, Daniel Normann, Mathias Hansen Eide, Brynjar Gjerding, Torstein Olderkjær og Mads Jørgensen. På det sigrande Halsnøy-laget var Ovidie Eide, Alida Nesheim, Silje Eide, Siren Njøs, Malin Lygre, Kristine Lygre, Hanna Mehammer.