Forventar stor overskriding

I kommunestyret på torsdag stilte Thorleif J. Hellesøy (Frp) spørsmål om gang- og sykkelvegen i Herøysundet. Han hadde håpa at heile strekninga skulle bli teke no.

– Eg er bekymra for kor langt sørover dette prosjektet går. Skal det stoppa i den bakken det ser ut til i dag? I så fall er det lite gjennomtenkt økonomisk. Skal ein dela prosjektet i to, så blir det frykteleg dyrt å ta den andre halvdelen, sa politikarveteranen.

Ordførar Hilde Enstad (Ap) svarte at ho ynskjer at kommunestyret skal få ei orientering om alle tiltaka i Kvinnheradpakken.

– Kor langt dei er komne? Kva står på vent? Dette er særleg viktig no som vi er byrja å snakka om Kvinnheradpakken 2. Eg vil invitera dei ansvarlege i fylket til å koma hit for å gje oss ei full orientering, fortalde ho.

Overvassproblem

Kommunedirektør Ragnhild Bjerkvik kunne opplysa nokre konkrete detaljar om prosjektet i Herøysundet. Ho minna om at yttergrensene for gang- og sykkelvegen i denne omgang er krysset ved Bringedalsbygda i nord og krysset til Sjøvegen i sør. I tillegg skal det etablerast ei busslomme sør for Sjøvegen.

– Det er sett av 33 millionar kroner til prosjektet, men ein forventar ei overskriding på 7 millionar, noko som vil gå utover dei andre prosjekta (i Kvinnheradpakken). Overskridinga skuldast grunn- og overvassproblem, avslørte ho.

Ifølgje Bjerkvik ligg det an til ferdigstilling i februar.