Fortalte miljø- og energikomiteen kor lite velkomne nye kraftlinjer er

Statnett ynskjer å erstatta dagens 300 kV-linje mellom Austrepollen og Matre med ei linje for 420 kV. Eit av forslaga til ny trasé går ved sida av dagens linje, altså gjennom Rosendal og då også over Baroniet Rosendal sitt areal på sjøsida av Avlsgarden.

Ettersom komiteen til Hans Inge Myrvold (Sp) starta dagen i nettopp Avlsgarden, kunne direktør ved Baroniet Rosendal Anna Lena Flatland og styreleiar for Den Weis-Rosenkroneske Stiftelse, direktør ved Universitetet i Oslo Arne Benjaminsen like godt ta med seg heile komiteen dei 200 meterane ned til staden der linja kryssar Baroniet sitt området på sjøsida av Avlsgarden.

Verdiskaping

Då hadde allereie Øystein Skaala på vegner av Rosendalstiftinga tatt på seg å forklara kor viktig landskapet er for verdiskapinga i området.

– Geologien er veldig tett knytt til det me lever av her. Oppdrett i fjorden er resultat av geologien. Me har to store kraftprodusentar her i SKL og Statkraft som utnyttar geologien. I tillegg er reiseliv og turisme knytt til landskapet, påpeika Skaala.

Flatland og Benjaminsen sa tydeleg frå til stortingspolitikarane at dei ikkje ynskjer ei ny, høgare og breiare kraftlinje gjennom landskapet til Baroniet.

– Sjøkabel utanom Rosendal er førstevalet vårt, med jordkabel som alternativ to, sa dei med noverande linje rett over hovuda til politikarane.

– Me er også redde for at den noverande linja blir ståande som ei reservelinje etter den nye er på plass, sa Flatland.

Det var mange profilerte miljøpolitikarar blant komitémedlemmene. Tidlegare klima- miljøvernminister Ola Elvestuen (V, 2018-2020), tidlegare leiar i Naturvernforbundet Lars Haltbrekken (SV) og Une Bastholm (MDG) var alle på ballen og stilte spørsmål til Flatland og Benjaminsen.

Svaret derifrå var tydeleg, dei kjem til å stå på det dei kan for å få den nye linja ut av syne.