Første rapport om levekår for transpersonar
I ein nyleg publisert rapport om seksuell orientering, kjønnsmangfald og levekår har forskarar frå Universitetet i Bergen funne ut at transpersonar har markant dårlegare levekår enn heterofile, cispersonar og andre typar skeive personar i Noreg.
Publisert
Prosjektet er leia av Norman Anderssen, som også leia ei liknande undersøking i 2013. Den gong var ikkje transpersonar inkludert i spørjeundersøkinga, og det finst såleis ikkje noko samanlikningsgrunnlag for transpersonar frå tidlegare forsking.
Hovedfunna i undersøkinga er knytt til psykisk helse, livstilfredsheit og diskriminering, og vert samanfatta under tre punkt:
Annonse
– Transpersonane rapporterte om levekårsutfordringar og erfaringar med ulike former for diskriminering. Samstundes rapporterte dei også om stoltheit og støtte, og deltaking i organisasjonsliv, skeive organisasjonar og vennenettverk.
Det neste punktet peika på at lesbiske kvinner og homofile menn i stor grad rapporterte om levekår på lik linje med heterofile kvinner og menn, men at dei var noko meir utsett for psykiske helseplagar.
– Analysane viser små og få skilnadar mellom heterofile og lesbiske kvinner. Skilnadane mellom heterofile og homofile menn er også relativt små, men på fleire punkt var det signifikant fleire homofile menn enn heterofile menn som rapporterte om levekårsutfordringar.
Fleire utfordringar blant bifile
Annonse
Som tredje punkt vart det vist til at det blant bifile menn og kvinner var fleire som rapporterte om levekårsutfordringar enn blant lesbiske kvinner, homofile menn og heterofile kvinner og menn. Sidan undersøkinga som vart gjennomført i 2013 er det såleis tydeleg at utfordringane blant bifile kvinner og menn har auka dei siste åra.
Rapporten, som i tillegg til Anderssen er utarbeidd av Helga Eggebø, Elisabeth Stubberud og Øystein Holmelid, er gjort på oppdrag frå Barne-, ungdoms- og familiedirektoratet. Bakgrunnen for denne rapporten er at Stortinget i 2017 bedde Regjeringa om å setje i gong med ei ny landsdekkjande undersøking av levekår blant skeive. Dette er den fjerde nasjonale levekårsundersøkinga av dette slaget, som for første gong inkluderte transpersonar, altså personar som bryt med normer for kjønn.
Den første undersøkinga i denne rekkja daterer seg til 1978, som såleis vart initiert fem år etter at det ikkje lenger var straffbart å vera homofil i Noreg.
