Forslag om å fjerna lokal beredskap: – No kjem ein tilbake til slik det var før 22. juli

Leiargruppa i Vest politidistrikt ynskjer no å samla alle UEH (Utrykkingseiningar) i Bergen, Voss og Førde. Alternativet er at alle skal til Bergen. I dag er stoda derimot at slike UEH-ar finst over heile politidistriktet. Også tilsette i Kvinnherad har denne spesialtreninga.

– Vi er usamde i premissane. Dei presenterer ting som om det er fakta, men som vi er heilt usamde i sett frå vår ståstad. Det blir nesten som å velja mellom pest og kolera; enten så må vi gå for dette forslaget, elles blir alt lagt til Bergen, kommenterer Ingve Hesjedal, mest i rolla som lokalpolitikar for Sp, men han er også politibetent med UEH-godkjenning sjølv.

Røykdykkar

For å beskriva kva ein UEH eigentleg er, meiner han det kan samanliknast med ein røykdykkar. Det er dei som tek på seg dei farlegaste oppdraga ved alvorlege hendingar, og er trena til det,

– Forslaget vil drepa motivasjonen vår. Vi vil ikkje lenger ha dei same moglegheitene for utdanning og kurs innan operativ teneste som dei i meir sentrale strøk, og vi kan dermed risikera at folk sluttar og at vi mistar kompetansen. Det er veldig synd, vurderer Julie Kambe, tillitsvalt for Politiets fellesforbund på Kvinnherad politistasjon.

Ho meiner at forslaget spesielt vil råka lokale, kvinnelege politibetjentar. Det har nemleg vore eit uttalt mål å få fleire kvinner inn i UEH.

– Vi har kvinner både i Kvinnherad og Hardanger som ynskjer operativ retning, og som nyleg deltok på eit motivasjonskurs til UEH. Men desse må no flytta frå distriktet og jobben på Husnes og Odda, og til ein av dei tre tettstadene om dei skal følgja draumen om ei operativ stilling i politiet, fortel Kambe.

Allereie denne veka kan det vera at Vest politidistrikt gjer vedtaket sitt.

– Dette er starten på nedbygginga i distrikta. No kjem ein tilbake til slik det var før 22. juli (Utøya). Men slike ting kan skje i distrikta også; det er ikkje berre i byane at terror og kritiske hendingar kan oppstå. Sjå berre på Valdresekspressen og bogeskytinga på Kongsberg. Dette er døme på viktigheita av at vi opprettheld den operative spesialkompetansen ute i distrikta, i staden for å byggja den ned, seier Kambe.

Stor misnøye

– Kva ynskjer de at politidistriktet skal gjera?

– At dei startar på nytt og involverer dei som kjenner distrikta best, kommenterer Ingve Hesjedal.

– Men medbestemmingsretten eksisterer ikkje. Det verkar som at alt er bestemt på førehand, slår Julie Kambe fast.

Duoen slit med å forstå argumentasjonen til politileiinga.

– Det er tvilsamt om forslaget vil føra til betre beredskap, kanskje med unnatak av i Bergen, Voss og Førde. Korleis kan dei hevda at beredskapen blir betre? Det er stor misnøye i Sogn og Fjordane, stor misnøye i Hordaland og litt misnøye i Bergen. Ingen er nøgde, analyserer Hesjedal, og legg til at Kvinnherad og Odda har like mange væpna oppdrag som Voss.

Som Sp-politikar har han vore i kontakt med stortingsrepresentant Hans Inge Myrvold om saka, og fått full støtte frå han. Hesjedal meiner at sentraliseringsforslaget umogleg kan vera i samsvar med Sp sin lovnad om å styrka beredskapen i distrikta.

Langt frå alt

Lokalpolitikar Lars Røyrvik stadfestar at regjeringskollega Ap heller ikkje er nøgd med utspelet frå Vest politidistrikt.

– Ap vil i minst mogleg grad gå inn og overstyra politidistriktet, men det står i Hurdals-plattforma at det skal vera lik tryggleik uansett kvar folk bur. Ap støttar difor fagkompetansen lokalt i at det framlagde forslaget er ei dårleg løysing, seier han.

– Kva direkte konsekvensar vil forslaget få for Kvinnherad?

– Vi bur langt frå alt. Det bli ta tid å få tak i ekstra kompetanse frå Bergen og Voss ved skarpe oppdrag. Kvinnherad blir òg mindre attraktivt for politifolk når ein tek frå dei moglegheita for ein operativ karriere, seier Ingve Hesjedal.

– Publikum vil ha eit politi som bur i og kjenner kommunen dei arbeider i. Skal betjentane koma frå Voss eller Bergen, vil dei ikkje kjenna korkje geografi eller tilhøva her, utdjupar Julie Kambe.