Forskarfabrikkens sommarlab: Ei veke som forskarar
Også i sommar arrangerer Hydro og Forskarfabrikken sommarlab på Husnes. Glade og lærevillige born i alderen 9 til 12 år var samla på Underheim skule.
Publisert
Årets sommarlab på Husnes vert arrangert på Underheim skule, og er eit forskarkurs over fem dagar. Ida Øvrelid og Torje Nysæther er leiarar av kurset, og dei begge ynskjer å spreia realfagglede til borna.
– Målet er å få borna interessert i naturvitskap, slik at dei ynskjer å utforske det på eiga hand. Me gjer realfag om til praktiske fag, der borna får utforska og eksperimentera både ute og inne. I dag har me fokusert på energi, eigenskapar til vatn og korleis det påverkar vatn. Me steller i stand mange ulike forsøk som er meint for å ha det morosamt. Borna forstår kanskje ikkje alt hundre prosent, men det vekkjer interesse, fortel kursleiar Ida Øvrelid.
Annonse
Det var 22 små-forskarar påmeldt, og kvar og ein såg ut til å lika eksperimenta som føregjekk i klasserommet. Amalie Vatterdal Markus syns spesielt det eine forsøket var interessant.
– I dag har me prøvd å eksplodera vatn med kolsyretablettar. Det var kjempe kjekt, spesielt sidan gruppa mi fekk det til, smilar ho.
– Ja, det var gøy. Det gjekk fortast å eksplodere det varme vatnet, i forhold til det kalde. Eg er glad me har fire dagar til med sommarlab, skyt Tuva Lund inn.
Forskarkurset held fram fredag, og i løpet av dagane skal borna mellom anna byggja sin eigen solcellebil, samarbeida om å knekka kodar og laga elektriske maskinar av resirkulert materiale.
