Forrykande start for lokal røykelaks

Rune Eide frå Halsnøy har fått på plass avtalar med 20 butikkar som skal selja røykelaksen hans denne påsken.

Like før jul bestemte Rune Eide seg for å gjera alvor ut av hobbyen sin, og starta då opp med produksjon av røykelaks heime i garasjen på Halsnøy. Han produserte og leverte 230 kilo Kloster Laks i tre forskjellege smakar til jul, eit parti som vart seld ut på under éi veke.

– Det kom mange gode tilbakemeldingar frå folk som likte laksen, og det har eigentleg gått i eitt sidan då, seier Rune Eide.

Maks produksjon

Han hadde då avtale med Spar-butikkane på Halsnøy og Valen, samt til cateringverksemder i Kvinnherad og på Skånevik. Til påske kjem han til å nå ut til eit endå større publikum.

– Eg tok kontakt med Coop og Rema 1000 for å høyra om dei var interessert. Så no har eg fått på plass ein avtale med regionskontora til Coop, Rema 1000 og Norgesgruppen om at eg får selja laksen i butikkar her lokalt. Totalt blir laksen å finna i 20 butikkar til påske. Det er veldig kjekt, seier han.

Med fleire butikkar aukar også produksjonen betrakteleg. Til påske er det ikkje lenger 230 kilo fisk som skal røykast og pakkast heime i Eidsmarka.

– Det vart litt mykje no, eigentleg. Vi fylte huset heilt til randen og har produsert og vakuumpakka 560 kilo. Så det vart maks produksjon til påske. Så eg ser allereie no at når vi kjem opp i slike mengder så kunne vi trengt fleire i produksjonen, seier Eide fast.

Gin og laks

Nytt før den komande høgtida er at lakserøykaren har leika seg med nye smakar utover dei tre typane; klassisk, einebær og chili, som 33-åringen har produsert fram til no.

– Eg sat på jobb i Nordsjøen og tenkte at vi burde få på plass nokre nye smakar til påske. Og etter å ha fundert på fleire ulike alternativ, så kom eg på gin. Den har jo den utprega einersmaken, så eg tenkte det kunne bli bra, seier Rune.

Og det blei det. Han tok vidare kontakt med Gin-produsentane i Bareksten, og fekk på plass ein avtale.

– Dei synest det var ein god idé, så eg reiste opp til dei og gav dei ein smaksprøve, seier Rune.

Gin-produsentane likte det dei fekk servert.

– Vi veit jo at gin og sjømat er ein fantastisk kombinasjon, og det var det her òg. Vi er imponerte, seier Eskil Tjore i Bareksten.

Men det var ikkje berre smaken på produktet som gjorde at Bareksten hadde lyst til å samarbeida med Eide.

– Nei, det som er gøyast er jo at dette er lokalt. Vi starta jo sjølv opp på Flesland med to tomme hender, så vi kjenner godt til den vegen han no må gå for å få visjonen sin til å bli noko. Når vi ser nokon som har ein sånn visjon og pasjon for sitt produkt, så får vi ekstra lyst til å hjelpa, seier Tjore.