Formene på plass - no skal produksjonslinja lagast

I Ølve skal Herde Kompositt no setja i gang med bygginga av Hauge Aqua sitt fyrste lukka anlegg «Egget». Nyleg leverte Easy Form formene til miniegget, som er ei mindre utgåve av det som skal bli eit 44 meter høgt egg.

I førre veke meldte industriverksemda i sosiale media at dei har fått levert dei fyrste to av totalt fire former som utgjer den geometriske forma for panela som skal vakuum-trekkast.

Cato Lyngøy i Hauge Aqua seier til Kyst.no at no går det slag i slag framover med «Egget».

– Det vert artig å sjå dei fyrste fysiske delane til Egget bli ein realitet. Sidan me signerte kontrakten i februar, har me hatt eit tett og fortløpande samarbeid med Herde Kompositt. Me synes at me oppnår gode løysningar saman. Me har også oppretta og rekruttert ein ny ingeniørstilling for byggeoppfølging som skal sørge for at samarbeidet skal fungere på best mogleg måte, seier Lyngøy til Kyst.no.

Egget er eit flytande, semilukka gjennomstrømmingsanlegg for fiskeoppdrett, også kjend som «Postsmolt-Egget», og skal byggast i sandwich kompositt, eit materiale som toler høg belastning over tid.

Startar opp om kort tid

Dagleg leiar Kim Røssland ved Herde Kompositt seier til Kyst.no at dei er glade for at formene no er på plass, og at produksjonsarbeidet med «Egget» om kort tid kan starta opp.

– I denne leveransen kom to av fire støypeformer, og desse dannar hovuddelen av strukturen til egget. Dimensjonane er 13x6 m på den eine og 10x6m på den andre. Så kjem topp og botn i slutten av juni. Det neste steget vert no å byggja ei produksjonslinje i støyperiet for eggdelane. Me planlegg å starta produksjonen av dei store seksjonane i løpet av 14 dagar. Produksjon av former til smådelar er allereie i gang, opplyser Røssland.

Han fortel om veldig stor interesse knytt til prosjektet.

– Dette er noko nytt og innovativt. Saman med bruken av kompositt som byggjemateriale vil dette gje svært høg fleksibilitet, tåla høg belastning og ha svært lang levetid. Det ser ut som fleire og fleire får augo opp for dette fleksible materialet, seier han.

Miniegget fyrst ut

I fyrste omgang skal det byggast eit egg på 21 meter høgde og 15 meter i diameter, og har 1850 kubikkmeter vatn som oppdrettsvolum. Dette er berre ein tidel av storleiken, men banar veg for hovudprosjektets 44 meter høge egg.

Røssland fortel at dette egget skal være klart til å ta imot fisk i mars 2022, og det er rundt 15-20 av deira tilsette, samt ein del underleverandørar som jobbar med prosjektet.

– Dette er et svært viktig og spanande prosjekt for oss i Herde. Me har som strategi å ta del i den grøne utviklinga som skjer innan havbruk. Og me er veldig nøgde med å bli føretrekke som leverandør for Egget i stor konkurranse med både innan- og utanlandske aktørar.

– Dette understrekar kanskje fabrikkens største styrke som er lang kompetanse innan komposittproduksjon. Dette betyr også at me sikrar arbeidsplassar og bevarer kompetansen på Ølve, noko som også er veldig viktig for oss, påpeikar han.

Røssland fortel dei også jobbar med en del anbod innan det grøne skifte i maritime bransjar.