Forlenger strenge nasjonale tiltak
Regjeringa har bestemt seg for å forlenga dei strenge nasjonale tiltaka med to ekstra dagar, frå 12. til og med 14. april.
Publisert
Sist oppdatert
– Dermed får vi eit betre grunnlag til å vurdera korleis påskeferien har påverka smittesituasjonen, seier helse- og omsorgsminister Bent Høie i ei pressemelding.
Helsedirektoratet og FHI har meldt til helse- og omsorgsdepartementet at talmateriale og erfaringar frå påsken ikkje vil vera på plass før i slutten av neste veke. Regjeringa sine vurderingar og anbefalingar vidare er avhengige av desse tala.
Annonse
Britisk variant
– Den engelske virusvarianten, som dominerer i Norge, er ikkje berre meir smittsam, men fører også til meir alvorleg sjukdom og fleire sjukehusinnleggingar. 25. mars innførte regjeringa strengare nasjonale tiltak for å hindra at smitten skal spreia seg til områder i landet med lite smitte, seier Høie og legg til.
– I tillegg er det svært strenge tiltak i dei områda som har høgast smitte, som i Oslo, Viken, Haugalandet og i Bodø-området. Vi ynskjer å la Helsedirektoratet og FHI få meir tid til å vurdera situasjonen, slik at vi får eit endå betre avgjerdsgrunnlag for nasjonale tiltak framover.
