Førjulsstund under lyslenkene

Elevrådsleiar Pernille Marie Syversen, lærar Anne Helen Kaldestad og rektor Nina Taranger Bernhardsen var alle samde om at det vart ei vellukka stund under lyslenkene i apejungelen ved idrettsplassen i Herøysundet.

– Dette er ein elevkveld, som er noko me plar ha eit par gonger i skuleåret. Men det ikkje vore så mange som har kome dei siste gongane, og ofte blir det ikkje slik me hadde planlagt når me har vore inne på skule. Difor tenkte me at me ville ha noko utandørs i staden, fortel Pernille Marie Syversen.

– Då kunne alle elevane vera med på ein gong, og det er litt koseleg, meiner ho.

Akebakke

Elvevrådet og FAU tok regien på arrangementet, men hadde fått litt god draghjelp frå anna hald også.

– Me var så heldige at bygdelaget har fått opp lys for oss også her i apejungelen, seier rektor ved Bringedalsbygda skule Nina Taranger Bernhardsen.

Dette er ikkje for alle å ha omgjevnadane som ho og dei andre fekk boltra seg i denne måndagskvelden.

– Det var skikkeleg heldig at det vart snø, og det har vore stor aktivitet i akebakken, smiler og nikkar bort til brekka frå skulen og ned til idrettsplassen.

Det eine akebrettet etter det andre skaut fart nedover, og det var ikkje berre barna som prøvde kva fart ein kunne få. Christian Tveiten gjorde sitt for at dottera Tuva Veastad Tveiten skulle få oppleva litt g-krefter i svingen. Fireåringen kvein av glede på veg nedover, og var eit einaste stort smil.

Nissefar

To timar i apejungelen går fort når ein har det kjekt. Grilling og fyr på bålpanna er stemningsskapande når snøen ramar inn det opplyste området. Både marshmallows og pølser fekk varma seg før dei vart fortærte, og oppe hos rektor på skulekjøkkenet kunne ein henta seg gløgg.

– Det vart for bale å bera ned, forklarer ho.

– Dette er første gong me har gjort det som dette. Me plotta inn denne kvelden i kalenderen for nokre veker sidan. Då visste me ikkje at vêret skulle bli som dette. Me har elevkveldar to gonger i året, og vanlegvis har me delt småstrinnet og mellomsteget i kvar sine kveldar. Denne gongen har me med alle på heile skulen, seier Anne Helen Kaldestad.

Det var forresten ein gjest til som kom. Sjølvaste julenissen fann vegen gjennom om småskogen ved apejungelen, og hadde med nokre små førjulsgåver til barna i sekken.

Innartiar

Bringedalsbygda skule har 46 elevar om dagen, og då blir det ei handterbar folkemengd ute i apejungelen.

– Nokre har småsøsken med seg, og då blei dette som ein familiekosekveld, meiner Anne Helen.

Og koseleg vart det for både store og små. Dei små nytta seg av apparata i apejungelen, og heldt varmen på det viset. Dei vaksne varma seg på gløgg, bålpanne og småprat seg i mellom. Alt idyllisk innråma av dei lunande lyslenkene over hovuda deira. Då beit ikkje minusgradene særleg heller.

– Me var heldige og trefte med dette. Det vart det ein innertiar for oss, sluttar trioen Pernille, Anne Helen og Nina i tide til å få sjekka kva nissen har med seg,